ՀՀԿ փոխնախագահ Արմեն Աշոտյանը չպետք է բացակայի իր բնակության վայրից 22:00-ից մինչև 08:00-ը: Այս մասին ֆեյսբուքյան գրառմամբ հայտնել է փաստաբան Տիգրան Աթանեսյանը՝ մանրամասնելով վերաքննիչ դատարանի որոշումը:
Դատարանը օգոստոսի 1-ին Աշոտյանի տնային կալանքը փոխարինել էր վարչական հսկողությամբ, սակայն վարչական հսկողության պայմանները չէր հայտնել:
«Քիչ առաջ Արմեն Աշոտյանին այցելեցին պրոբացիայի ծառայության աշխատակիցները` տնային կալանքը դադարեցնելու և վարչական հսկողություն կիրառելու համար: Ըստ դատարանի որոշման` Արմեն Աշոտյանը պետք է չբացակայի իր բնակության վայրից 22:00-ից մինչև 08:00-ն: Շաբաթական 3 անգամ պետք է այցելի պրոբացիայի ծառայություն գրանցվելու համար, ինչպես նաև արգելվում է հաղորդակցվել գործով դեռևս չհարցաքննված վկաների հետ: Բացի դրանից՝ պահպանվում են գրավը և բացակայելու արգելքը», – գրել է նա:
Փաստաբանը հավելել է, որ վերաքննիչ դատարանը սահմանել է վարչական հսկողության բավականին խիստ տարբերակ, որը, ըստ նրա, դժվար է անվանել «լիարժեք «ազատություն»»:
2022 թվականի նոյեմբերի 16-ին Աշոտյանին մեղադրանք էր առաջադրվել պաշտոնեական լիազորությունները չարաշահելու և փողերի լվացման համար։ Նրան կալանավորել էին 2023 թվականի հունիսի 16-ին։ Իրավապահները որպես կալանավորման պատճառ նշել էին խափանման միջոցի խախտումը՝ բնակության վայրից չհեռանալու մասին ստորագրությունը։ Մարտի 10-ին դատարանը որոշել էր 3 ամսով երկարաձգել Աշոտյանի տնային կալանքի ժամկետը։ Հունիսի 9-ին Աշոտյանի տնային կալանքը երկու ամսով երկարաձգվել էր։
