ՄԻՊ Անահիտ Մանասյանը մեկնաբանել է 2 ամսով կալանավորված Հրայր սարկավագ Հակոբյանին ազատ արձակելու, նրա խափանման միջոցը բացակայելու արգելքով և վարչական հսկողությամբ փոխելու դատավորի որոշման քննադատությունը։ Նշենք, որ սոցցանցերում դատավորին մեղադրել էին «ահաբեկչին ազատ արձակելու մեջ»։
ՄԻՊ-ը հայտարարել է, որ Հայաստանում անկախ պաշտոնատար անձինք պարբերաբար թիրախավորվում են, այդ թվում՝ միջազգային չափանիշների տեսանկյունից արգելված տարբերակներով։
Լրագրողների հետ ճեպազրույցում նա հիշեցրել է, որ արքեպիսկոպոսներ Բագրատ Գալստանյանի ու Միքայել Աջապահյանի անմեղության կանխավարկածի հարցով հայտարարություն է արել ի սկզբանե։
«Կհորդորեմ ցանկացած իրավիճակում դատական իշխանություն ունեցող մարմինների, մարդու իրավունքներով զբաղվող անկախ մարմինների գործունեության տեսանկյունից, չխոչընդոտել նրանց գործունեությանը, այդ թվում՝ հանրային ճնշում ձևավորելու միջոցով։ Դա հակասում է միջազգային չափանիշներին»,- ընդգծել է Մանասյանը։
Ըստ նրա՝ թիրախավորման ցանկացած դեպքի կարող է մտահոգիչ լինել։
«Առաջին հերթին՝ հարցի հետ կապված հասցեավորել եմ իրավապահ մարմինների գործողությունները։ Շատ կարևոր է հարցին վերաբերելի նրանց զսպվածությունը, օգտագործվող խոսույթը և այլն, բայց կարևոր է նաև, որ մնացյալ դերակատարներն այս հանգամանքը հաշվի առնեն»,- ասել է Մանասյանը։
Միևնույն ժամանակ, ըստ ՄԻՊ դիտարկումների, Հայաստանում նման դեպքերի նվազման միտում կա։
«Հարցն ամբողջությամբ չի լուծվել, և հույս ունեմ, որ հնարավոր կլինի լուծել»,- նշել է ՄԻՊ-ը։
Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին Գալստանյանին ու Շիրակի թեմի առաջնորդ Միքայել արքեպիսկոպոս Աջապահյանին, ինչպես նաև ընդդիմադիր «Սրբազան պայքար» շարժման 14 աջակցի։ Աջապահյանը մեղադրվում է իշխանության բռնազավթման հրապարակային կոչեր հնչեցնելու, իսկ Գալստանյանը և «Սրբազան պայքարի» աջակիցները՝ պետական հեղաշրջման փորձ կազմակերպելու մեջ։ Բոլոր կալանավորվածները չեն ընդունում մեղադրանքը:
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
