Ամենայն Հայոց կաթողիկոս Գարեգին Բ-ին հեռացնելու շուրջ քննարկումներից մեկը «Քաղաքացիական պայմանագրում» վերաբերել է կաթողիկոսարանը համակիրների կողմից շրջապատելուն, գրել է «Հրապարակ»-ը։
Ըստ թերթի՝ հանրային տրամադրություններն ստիպել են, որ իշխանությունը հրաժարվի այդ մտքից, քանի որ հասկացել է՝ եկեղեցուն պաշտպանողները տասնյակ անգամ կգերազանցեն կաթողիկոսի դեմ դուրս եկած մարդկանց։
Լրատվականը պարզաբանել է, որ որոշ հարցումներից հետո որոշվել է համակարգող խումբ ձևավորել, որը կզբաղվի եկեղեցու հարցերով։
Իշխանությունը հույս ունի հանրության տրամադրությունները փոխել «ստատուային պատերազմով», հասնել կաթողիկոսին «մերժելուն», որպեսզի նրա նյարդերը ՀՀ երրորդ նախագահ Սերժ Սարգսյանի օրինակով տեղի տան և հեռանա։
Մայիսի 29-ին ՀՀ վարչապետ Նիկոլ Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։ Հունիսի 9-ին վարչապետը կոչ էր արել համախմբվել նոր կաթողիկոսի ընտրության շուրջ՝ պնդելով, որ Գարեգին Երկրորդը զավակ ունի: Հունիսի 10-ի վաղ առավոտյան Փաշինյանն առաջարկել էր ստեղծել համակարգող խումբ՝ Սուրբ Էջմիածնի Վեհարանն ազատելու և կաթողիկոսական նոր ընտրությունների օրակարգի կազմակերպչական հարցերի համար։
Հունիսի 11-ին՝ կեսգիշերն անց, Ամենայն Հայոց կաթողիկոսն ԱՄԷ-ից վերադարձել էր Հայաստան, նրան դիմավորել էին իր աջակիցները: Գարեգին Բ-ն հայտարարել էր՝ վարչապետի հայտարարությունները համընդհանուր վրդովմունք են առաջացրել:
