Արևմուտքը բացահայտ ուլտիմատում է դրել մայիսի 9-ի Հաղթանակի օրվա շքերթին ՀՀ վարչապետ Նիկոլ Փաշինյանի՝ Մոսկվա մեկնելու շուրջ, գրել է «Հրապարակ» օրաթերթը՝ հղում անելով իշխանական աղբյուրներին։
Ըստ թերթի՝ Փաշինյանին ասվել է, որ հայ-ռուսական հարաբերությունների ջերմացումն իրենց համար ընդունելի չէ, և Էստոնիա կատարած պաշտոնական այցով Փաշինյանը փորձել է մեղմել Արևմուտքի վերաբերմունքը։
Թերթի փոխանցմամբ՝ Փաշինյանն Էստոնիա էր մեկնել ուղերձով, որ ստիպված է գնում Մոսկվա՝ «Ռուսաստանից սպասվող հարվածը կանխելու համար»։
Եվրամիության (ԵՄ) արտաքին գործերի և անվտանգության քաղաքականության հարցերով բարձրաստիճան ներկայացուցիչ Կայա Կալլասը շաբաթներ առաջ հրապարակային հայտարարել էր, որ ԵՄ անդամության թեկնածու երկրները պետք է չմասնակցեն Մոսկվայի զորահանդեսին։ Կալլասն էստոնացի է, նախկինում զբաղեցրել է այդ երկրի վարչապետի պաշտոնը:
Փետրվարի 12-ին ԱԺ-ն 63 կողմ, 7 դեմ ձայների հարաբերակցությամբ հավանություն էր տվել ԵՄ-ին անդամակցության մեկնարկի մասին օրինագծին։ Հունվարի 9-ին ՀՀ կառավարությունը հավանություն էր տվել ԵՄ-ին երկրի անդամակցության գործընթաց սկսելու օրինագծին։
«Քաղաքացիական պայմանագիր» խմբակցությունը հայտարարել էր ԵՄ-ին երկրի անդամակցության գործընթացի մեկնարկի նախագծին «կողմ» քվեարկելու իր մտադրության մասին` քվեարկությունից առաջ 20 րոպե ընդմիջում վերցնելով քննարկման համար:
ԵՄ-ին Հայաստանի անդամակցության վերաբերյալ առաջին քննարկումները սկսվել էին, երբ 2024 թվականի մարտի 13-ին Եվրախորհրդարանը հավանություն էր տվել Հայաստանին ԵՄ անդամակցության թեկնածուի կարգավիճակ տրամադրելու առաջարկին: 2024 թվականի հուլիսի 1-ին «Հայկական ժողովրդավարության ֆորումի» ժամանակ ՀՀ վարչապետը ոչ նպատակային էր անվանել ԵՄ-ին անդամակցելու վերաբերյալ հանրաքվեի անցկացումը։
2024 թվականի հունիսի 21-ին Հայաստանի խորհրդարանը լսումներ էր անցկացրել ԵՄ անդամակցության հայտի հանրաքվեի վերաբերյալ՝ հետևելով «Ժողովրդավարական ուժերի հարթակ» նախաձեռնող խմբի առաջարկին, որն անցած տարվա հոկտեմբերի վերջին հայտարարել էր, որ հանրաքվեի համար անհրաժեշտ 50 հազար ստորագրության փոխարեն հավաքվել են 60 հազարը։
