Եթե նույնիսկ առաջիկա կիրակի օրը լինի Սահմանադրական հանրաքվե, ապա այն ուղղակի չի կայանա, Ծիծեռնակաբերդում լրագրողներին ասել է ՀՀ երրորդ նախագահ Սերժ Սարգսյանը։
Ըստ նրա՝ ներկայիս իշխանությունները պարզապես չեն հասցնի հանրաքվե իրականացնել, և բոլոր ուսումնասիրությունները ցույց են տալիս դա։
«Չեմ կարծում, որ նրանք կարողանալու են հրաժարվել Անկախության հռչակագրից, որովհետև չեն հասցնի, չեն կարող»,- նշել է Սարգսյանը։
Նրա խոսքով՝ իշխանությունները չեն հասցնի պաշտոնավարել մինչև 2026 թվականը: Սերժ Սարգսյանը նշել է, որ իրենք պատրաստում են փողոցային պայքար, և դրա համար ունեն ծրագիր։
«Մենք առանց ծրագրի չենք գործում, բայց չեմ կարծում, որ այդ ծրագիրն իմաստ ունի հրապարակել»,- հավելել է Հանրապետական կուսակցության առաջնորդը։
Երրորդ նախագահը տեղեկացրել է, որ այս պահին դեռ հայտնի չէ՝ ով կստանձնի շարժման առաջնորդությունը և հայտարարել, որ ինքը պատրաստ չէ դա անել:
Լրագրողների հետ զրույցում Սարգսյանը պատասխանել է նաև ԱԺ նախագահ Ալեն Սիմոնյանի հայտարարությանը, թե ինքը խոսելուց առաջ ճիշտ կանի՝ «հայելուն նայի և ամաչի»:
«Եթե ամաչելուց ենք խոսում, ձեր նշած անձնավորությունը ու նրա հետ մի 70-80 մարդ այդ մասին ընդհանրապես պետք է լռեն, որովհետև իրենք պետք է կարմրեն, երբ նայեն հայելու մեջ»,- ասել է նախկին նախագահը։
Սարգսյանը նաև պնդել է՝ թեև իշխանությունները լիովին չեն ուրացել Հայոց ցեղասպանությունը, սակայն այդ ճանապարհին են։
«Ենթադրել, թե նրանք ինչ են մտածում, ինչու են անում, անշնորհակալ գործ է: Որ ասեմ՝ 100%-ով ուրացել են, չէ՛, այսօր եկել են այստեղ, բայց իմ կարծիքով՝ այդ ճանապարհին են: Ինչ էլ նրանք ասեն, ինչ էլ անեն, միևնույն է, մեր ժողովրդի 80%-ն ասելու է, որ նրանք դավաճան են: Այնպես որ, նրանց ասածի վրա ուշադրություն դարձնելն անշնորհակալ գործ է»,- եզրափակել է Սարգսյանը։
Ապրիլի 24-ին նշվում է Օսմանյան կայսրությունում տեղի ունեցած Հայոց ցեղասպանության 110-րդ տարելիցը, որը 20-րդ դարի առաջին ցեղասպանությունն է։ Այս օրը հայերը և ամբողջ քաղաքակիրթ աշխարհը հարգանքի տուրք են մատուցում մարդկության դեմ կատարված հրեշավոր հանցագործության զոհերի հիշատակին, որը խլել է մեկուկես միլիոնից ավելի հայերի կյանք։
Armenia Today-ի խմբագրակազմը հավաքել է Ցեղասպանության վերաբերյալ հիմնական ուսումնասիրություններ, ինչպես նաև արվեստի գործեր և դժոխքի տանջանքները վերապրած մարդկանց հիշողություններ։
