ԶԼՄ-ն հայտնել է, թե փակ նիստում ի՞նչ հարցեր են քննարկվել Շահրամանյանի հետ

Արցախի ներկայացուց­չությու­նում ապրիլի 21-ին ավելի քան երկու ժամ փակ քննարկում է տեղի ունեցել Արցախի նախագահ Սամվել Շահրամանյանի, պետնախարարի և արցախցի ակտիվիստների մասնակցությամբ, հայտնել է «Հրապարակ»-ը։

Ըստ թերթի՝ հանդիպման ժամանակ քննարկվել է 2 հարց։ Առաջինն Արցախի ներդրումային հիմնադրամի անհետացած միլիարդավոր դրամների վերադարձի հարցն էր։

Դեռևս նախորդ շաբաթվա վերջ մի խումբ արցախցիներ բողոքի ակցիաներ էին իրականացրել Արցախի ներկայացուցչության շենքի առջև՝ «պահանջելով Շահրամանյանից զբաղվել Արցախի պաշտոնյաների թալանի վերադարձով»։

«Այս հիմնադրամը պատերազմից հետո նախկին նախագահ Արայիկ Հարությունյանի ձեռքով դարձել էր յուրօրինակ «սկոչ», որով  փակել են բոլոր բողոքավորների բերանը՝ շարքայինից մինչև նախկին և ներկա պաշտոնյա»,- նշել է թերթը։

Լրատվականի տեղեկությամբ՝ Ներդրումային և գյուղատնտեսական հիմնադրամներից վարկեր են տրամադրվել տասնյակ-հարյուրավոր արցախցիների, որոնք բիզնես ծրագիր են ներկայացրել, մեկը՝ գազալցակայան սարքելու, մյուսը՝ մեղվաբուծությամբ զբաղվելու, երրորդները՝ այլ ծրագրերի համար։

Ըստ թերթի՝ այդ գումարների մի մասը նպատակային չի օգտագործվել, ոմանք ավելի շատ են օգտվել, քան մյուսները, և հիմա փորձում են շահարկել այս թեման: Շահրամանյանը հիշեցրել է, որ 2023 թվականի նոյեմբերի 8-ին համապատասխան գրություն է ուղարկել ՀՀ գլխավոր դատախազին, որի հիման վրա հարուցվել է քրեական գործ։ Այդ գործի շրջանակներում ինքը հրավիրվել է հարցաքննության` որպես վկա, առգրավվել են Արցախի ներդրումային հիմնադրամի էլեկտրոնային կրիչները, հարցաքննվել են նաև Արցախի պետական պաշտոնյաներ և Արցախի ներդրումային հիմնադրամի տնօրենը։

Խոսակցության երկրորդ թեման Արցախի նախագահի լիազորությունների երկարաձգումն էր, որի ժամկետը լրանում է մայիսի 21-ին, որից հետո խորհրդարանը կարող է նոր նախագահ ընտրել: Եվ որպեսզի պետական այս ինստիտուտը չլուծարվի, ցուցարարները Շահրամանյանին ասել են, որ լավ կլինի՝ այդ պաշտոնում լինի մեկը, ով կարող է շփվել, համագործակցել ՀՀ իշխանությունների հետ, որպեսզի իրենց խնդիրները չանտեսվեն։ Մոտավորապես, հասկացրել են, որ այդ ուղղությամբ էլ են պայքարելու։

Հանրահավաքի կազմակերպիչ Արթուր Օսիպյանը հայտարարել էր, որ «ՀՀ վարչապետ Նիկոլ Փաշինյանի օրոք Արցախ է ուղարկվել առնվազն 467 մլն դոլար, սակայն այդ գումարին տիրացել է 48 ընտանիք»։ Նա պահանջել էր, որ Արցախի նախագահը կապվի դատախազության հետ և կոչ անի անցկացնել արագացված քննություն՝ պաշտոնյաների կողմից հափշտակված միջոցների գործով։

Ապրիլի 18-ին Արցախի Ազգային ժողովի պատգամավոր Աշոտ Դանիելյանը նշել էր, որ արցախցիների՝ «թալանի» վերաբերող պահանջը գտնվում է Հայաստանի դատախազության իրավասության ներքո։ Նա բողոքի ակցիան սադրանք էր որակել։ Ավելի ուշ նախագահ Շահրամանյանը դուրս էր եկել ցուցարարների մոտ և ասել, որ պատրաստ է նրանց հետ գնալ դատախազություն և Քննչական կոմիտե։