2024 թվականի ընթացքում ոստիկանությունում կարգապահական տույժի կարգով ծառայությունից ազատվել է 50 աշխատակից, հայտնում է ՀՀ ՆԳՆ մամուլի ծառայությունը։ Միաժամանակ՝ ոստիկանության 21 ծառայող ազատվել է աշխատանքից ոչ կարգապահական տույժի կարգով։
Ըստ գերատեսչության՝ ՆԳՆ ներքին անվտանգության և հակակոռուպցիոն վարչությունում կատարվել են 1911 ծառայողական քննություններ և ուսումնասիրություններ: Նախարարության կառուցվածքային ստորաբաժանումների, ենթակա ծառայությունների և կազմակերպությունների աշխատողների նկատմամբ կիրառվել են 632 կարգապահական տույժեր։
ՆԳՆ-ից մանրամասնել են, որ ոստիկանության ծառայողների և աշխատակիցների նկատմամբ կիրառվել է 561 կարգապահական տույժ։
2024թ․ ընթացքում ՆԳՆ-ում նախապատրաստվել և նախաքննության մարմիններ են ուղարկվել 51 ծառայողական քննությունների նյութեր, որոնցով նախաձեռնվել են 46 քրեական վարույթներ (36-ը՝ ոստիկանության ծառայողների, 1-ը՝ փրկարար ծառայության, 5-ը՝ միգրացիայի և քաղաքացիության ծառայության, 2-ը՝ ՆԳՆ կառուցվածքային ստորաբաժանումների, 1-ը՝ ենթակա կազմակերպությունների աշխատակիցների, 1-ը՝ քաղաքացիների վերաբերյալ)։
Նշվում է, որ դրանք պարունակել են կաշառք ստանալու, պաշտոնեական լիազորություները չարաշահելու, պաշտոնեական կեղծիքի, պաշտոնեական անփութության, ապացույցներ, բացատրություններ կամ դատավարական փաստաթղթեր կեղծելու, պետական գաղտնիք պարունակող տեղեկություններ հրապարակելու, խարդախության, գողության, պետական սահմանն ապօրինի հատելուն օժանդակելու և այլ հատկանիշներ։
