Ադրբեջանը սադրում է, այդ սադրանքի նպատակը գործընթացներն էսկալացիայի տանելն է, բայց մենք հանգիստ, մեր քաղաքական գնահատականներով առաջ ենք գնալու: Խորհրդարանում այս մասին լրագրողների հետ զրույցում ասել է վարչապետ Նիկոլ Փաշինյանը:
Նա անդրադարձել է օրերս ԱԺ-ում Արցախի ինքնորոշման մասին իր ելույթի վերաբերյալ Արցախի ԱԺ խմբակցությունների երեկվա հայտարարությանը:
«Մենք հարցերի մեջ պետք է խորանանք, եթե հարցի բովանդակությունը խորությամբ չենք ըմբռնում, անընդհատ սխալներ ենք գործում ու գործել ենք: Ես Արցախի ԱԺ-ի կարծիքներին ուշադիր, հարգանքով եմ հետևում: Սովորաբար սխալ են հասկանում իմ հայտարարությունները, և չի բացառվում, որ այս անգամ էլ են սխալ հասկացել: Բայց, իմ կարծիքով, սխալ հասկանալու որևէ բան չկա, քանի որ գնահատակնները շատ հստակ են: Ես ուզում եմ ուշադրություն դարձնել հետևյալին` իսկ փաստարկների դաշտում ի՞նչ հակափաստարկ է հնչել»,- ասել է Փաշինյանը:
Անդրադառնալով ՀՀ ԱԳ նախկին նախարար Վարդան Օսկանյանի արձագանքին` «Մադրիդյան սկզբունքների» մասով արված իր հայտարարությանը, Փաշինյանը նշել է, որ Օսկանյանը որևէ փաստարկով չի հերքել իր ասածը:
Նա նաև հաստատել է Օսկանյանի այն հայտարարությունը, ըստ որի` 44-օրյա պատերազմից հետո Վարդան Օսկանյանը հանդիպել է Նիկոլ Փաշինյանին:
Ինչ վերաբերում է Օսկանյանի մատնանաշած երրորդ տարբերակին ու հարցին` ինչ առաջարկ է եղել այդ մասով, Փաշինյանն ասել է. «Թող իրենք հրապարակեն իրենց տարբերակները, ես իրենց խոսնակը չեմ»:
Փաշինյանն անդրադարձել է նաև Տեղ գյուղի հատվածում այս պահին առկա իրավիճակին:
«Ունենք 11 կմ, որից 5 կմ հատվածը պրոբլեմատիկ էինք համարում: Այդ պրոբլամատիկ հատվածը ևս 1,4 կմ-ով կրճատվել է` դառնալով 3,6 կմ: Սա նշանակում է, որ այդքան սահման ճշգրտվել է: Սա նշանակում է նաև, որ և՛ մենք, և՛ ադրբեջանցիներն այդ կետի վերաբերյալ ունենք մեկ ընդհանուր կարծիք առ այն, որ մեր սահմանային գիծն անցնում է այդտեղով»,- ասել է նա` նշելով, որ սահմանապահներն են իրար հետ աշխատել և սահմանային կետը ճշգրտել են։
Անդրադառնալով ՀԱՊԿ-ի առաքելությանը, ԵՄ քաղաքացիական առաքելությանը՝ նա նշել է, որ երկու առաքելությունները չի կարելի նույն հարթության վրա դնել։
«Ոչ միայն Ռուսաստանը, այլև Հայաստանը ևս պատրաստ է ՀԱՊԿ առաքելության տեղակայմանը։ Մեր ակնկալիքները ՀԱՊԿ առաքելությունից շատ ավելին պետք է լինեն, քան ԵՄ առաքելությունից են։ Մեզ համար կարևոր է, որ առաքելությունը լինի արդյունավետ։ Սա կարևոր է և՛ Հայաստանի, և՛ Ռուսաստանի, և՛ տարածաշրջանից համար»,- ասել ե վարչապետը։
Հիշեցնենք, որ ապրիլի 11-ին՝ ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։ ՀՀ ԱԳՆ-ն Բաքվի սադրանքը Հայաստանի տարածքային ամբողջականության դեմ ոտնձգություն է որակել։ ՀՀ ՊՆ-ն տեղեկացրել է ապրիլի 11-ի փոխհրաձգության հետևանքով դիրքային կորուստներ չունենալու մասին։
Հիշեցնենք նաև, որ օրերս ԱԺ-ում Փաշինյանը հայտարարել էր, որ ՀՀ-ն լիարժեքորեն ճանաչել է Ադրբեջանի տարածքային ամբողջականությունը։ Նա հայտնել էր, որ Մադրիդյան սկզբունքներով Արցախը ճանաչվել է Ադրբեջանի կազմում։ Երեկ ՀՀ նախկին ԱԳ նախարար Վարդան Օսկանյանն անդրադարձել էր Փաշինյանի պնդումներին։ Արցախի ԱԺ-ն անընդունելի էր համարել ՀՀ վարչապետի՝ Արցախի կարգավիճակն անտեսելու վերաբերյալ հայտարարությունը։
Հավելենք, որ ՀԱՊԿ քարտուղարության ներկայացուցիչ Յուրի Շուվալովը հայտարարել է, որ Հավաքական անվտանգության պայմանագրի կազմակերպությունը մշտական պատրաստակամության մեջ է առաքելություն ուղարկել հայ-ադրբեջանական սահման։ Մինչ այդ բազմիցս խոսվել է նաև Հանրապետությանը ռազմատեխնիկական աջակցություն ցուցաբերելու պատրաստակամության մասին։ ՀՀ ԱԳ նախարար Արարատ Միրզոյանը մարտի 20-ին Մոսկվայում ռուս գործընկերոջ հետ համատեղ մամուլի ասուլիսի ժամանակ նշել էր, որ ՀԱՊԿ առաքելություն ուղարկելու որոշման նախագիծը սեղանին է, նախագծի վրա աշխատանքները շարունակվում են: Միևնույն ժամանակ նա նշել էր, որ Երևանը գործընկերներից ակնկալում է քաղաքական գնահատական՝ կապված Ադրբեջանի սեպտեմբերյան ագրեսիայի հետ:
Մանրամասները՝ տեսանյութում։
