Իսրայելը մտադիր է Գազայում հասնել իր բոլոր նպատակներին, այդ թվում՝ բոլոր պատանդների ազատ արձակմանն ու ՀԱՄԱՍ-ի կարողությունների չեզոքացմանը, Վաշինգտոնում ԱՄՆ նախագահ Դոնալդ Թրամփի հետ հանդիպումից հետո ասել է Իսրայելի վարչապետ Բենյամին Նեթանյահուն, հայտնում է Aljazeera-ն:
Նեթանյահուն հայտարարել է՝ այդ քայլերն արվում են, որպեսզի Գազան այլևս սպառնալիք չներկայացնի Իսրայելի համար:
Թրամփի հետ հանդիպմանը նրանք քննարկել են Գազայի հատվածում ընթացող պատերազմը։
Հանդիպումից առաջ Թրամփի՝ Մերձավոր Արևելքի բանագնաց Սթիվ Ուիթկոֆը նշել էր, որ Իսրայելն ու ՀԱՄԱՍ-ը դեռ ունեն մեկ առանցքային հարց, որի շուրջ 60-օրյա հրադադարի վերաբերյալ պետք է համաձայնության գան։
Սա Նեթանյահուի արդեն երրորդ պետական այցն է ԱՄՆ՝ Թրամփի երկրորդ պաշտոնավարման ընթացքում։
Գազայի շարունակվող պատերազմն սկսվել էր 2023թ. հոկտեմբերի 7-ին: 2025թ. հունվարի 15-ին Իսրայելը և ՀԱՄԱՍ-ը փուլային համաձայնության էին եկել պատերազմը դադարեցնելու վերաբերյալ: Մարտի 18-ի լույս 19-ի գիշերը, սակայն, Իսրայելը վերսկսել էր հարվածները:
Իսրայելի հակահարվածի հետևանքով, Գազայի առողջապահության նախարարության տվյալներով, զոհվել է առնվազն 57 500 մարդ։
