ԱՄՆ նախագահ Դոնալդ Թրամփը լրջորեն դիտարկում է Իրանի դեմ Իսրայելի պատերազմին ամերիկացի զինվորականների մասնակցության հնարավորությունը, հայտնել է Axios-ը՝ հղում անելով իր աղբյուրներին:
Նրանց տվյալներով՝ Թրամփը «լրջորեն դիտարկում է պատերազմին միանալու և ԱՄՆ-ի կողմից Իրանի միջուկային օբյեկտներին, հատկապես Ֆորդոյում ուրանի հարստացման ստորգետնյա օբյեկտին հարվածելու հնարավորությունը»:
Նշվում է, որ Թրամփը հունիսի 17-ին Սպիտակ տան Իրավիճակային դահլիճում կհանդիպի Ազգային անվտանգության հարցերով իր թիմի հետ՝ հակամարտության վերաբերյալ ԱՄՆ քաղաքականության վերաբերյալ որոշումներ կայացնելու համար:
Ամերիկացի զինվորականներն ավելի շատ կործանիչներ են տեղափոխում Մերձավոր Արևելք, հայտնում է Reuters-ը՝ վկայակոչելով ամերիկացի պաշտոնյաներին։ Նրանց տեղեկություններով ՝ նախատեսվում է F-16, F-22 և F-35 ինքնաթիռների տեղակայում։ Նշվում է նաև Արևելյան Միջերկրական ծովում ԱՄՆ ռազմածովային ուժերի լրացուցիչ նավերի տեղակայման հնարավորությունը, որոնք կարող են խոցել բալիստիկ հրթիռներ:
Ավելի վաղ Թրամփն Իրանի գերագույն առաջնորդ այաթոլլա Ալի Խամենեիից պահանջել էր «անվերապահ կապիտուլյացիա»:
«Մենք հստակ գիտենք, թե որտեղ է թաքնված Իրանի, այսպես կոչված, գերագույն առաջնորդը։ Նա հեշտ թիրախ է, բայց այնտեղ նրա համար անվտանգ է։ Մենք նրան չենք պատրաստվում վերացնել (սպանել), համենայնդեպս՝ հիմա»,- նախագահի գրառումը սոցցանցում մեջբերում է ՏԱՍՍ-ը։
Հունիսի 16-ին հայտնի էր դարձել, որ ԱՄՆ-ն Եվրոպա է տեղափոխել ավելի քան 31 լիցքավորող ինքնաթիռ, ինչպես նաև Մերձավոր Արևելք է ուղարկել ամերիկյան Nimitz ավիակիրը:
