ԱՄՆ նախագահ Դոնալդ Թրամփը Truth Social հարթակում իր գրառմամբ ICE գործակալներին (Ներգաղթի և մաքսային ծառայություն) կոչ է արել ակտիվացնել արտաքսումները մրցակից դեմոկրատական կուսակցության ներկայացուցիչների կողմից ղեկավավող խոշոր քաղաքներում, ինչպիսիք են Լոս Անջելեսը, Չիկագոն և Նյու Յորքը:
Նրա խոսքով՝ նման քաղաքներում «միլիոնավոր ապօրինի ներգաղթյալներ են ապրում»:
Ըստ ԱՄՆ նախագահի՝ այս և նմանատիպ քաղաքները դեմոկրատական կուսակցության իշխանության հիմքն են, որտեղ նրանք ապօրինի ներգաղթյալներ են օգտագործում իրենց ընտրական բազան ընդլայնելու համար, ընտրական խարդախություններ են կատարում և ուռճացնում են սոցիալական ապահովության համակարգը՝ լավ վարձատրվող աշխատատեղերը և նպաստները խլելով աշխատասեր ամերիկացի քաղաքացիներից: Թրամփն ICE-ին և այլ դաշնային մարմիններին կոչ է արել «ներդնել բոլոր ռեսուրսները՝ պատմության մեջ զանգվածային տեղահանությունների ամենամեծ ծրագիրն» իրականացնելու համար:
Սպիտակ տան հայտարարությունների համաձայն՝ ICE-ի առջև նպատակ է դրված օրական ձերբակալել մինչև 3000 մարդու։ Այնուամենայնիվ, չնայած այն հանգամանքին, որ Թրամփի վարչակազմը հրապարակայնորեն պարծենում է անօրինական միգրացիայի դեմ պայքարի իր միջոցառումներով, CNN-ի մի քանի աղբյուրի համաձայն, պաշտոնյաները մասնավոր նկատողություն են ստացել այդ նորմային չհասնելու համար:
Անօրինական ներգաղթյալների զանգվածային ձերբակալություններն արդեն Լոս Անջելեսում հանգեցրել են բողոքի ցույցերի: Ցուցարարների և ուժայինների բախման հետևանքով Սպիտակ տունը քաղաք էր ուղարկել Ազգային գվարդիայի 2000 մարտիկի։
