Իսրայելի վարչապետ Բենյամին Նեթանյահուն տեսաուղերձ է հղել Իրանի ժողովրդին, որում հայտարարել է, որ իր երկիրն իրանցիներին թշնամի չի համարում և առաջարկել է նրանց ապստամբել Իսլամական Հանրապետության իշխանությունների դեմ, հայտնում է ՏԱՍՍ-ը։
«Իսլամական ռեժիմը, որը ճնշում է ձեզ մոտ 50 տարի, սպառնում է ոչնչացնել մեր երկիրը՝ Իսրայել պետությունը։ Իսրայելի գործողության նպատակն է վերացնել միջուկային և հրթիռային սպառնալիքն իսլամական ռեժիմի կողմից: Շարժվելով դեպի մեր նպատակը՝ մենք նաև մաքրում ենք ձեր ճանապարհը, որպեսզի դուք հասնեք ազատության»,- ասել է նա։
Իսրայելի պաշտպանության նախարար Իսրայել Կացը հայտարարել է, որ Իրանն անցել է կարմիր գծերը, երբ համարձակվել է հրթիռներ արձակել Իսրայելի քաղաքացիական բնակավայրերի ուղղությամբ: Նա հայտարարել է, որ «այաթոլլաների ռեժիմը շատ բարձր գին կվճարի իր հանցավոր գործողությունների համար»:
Իսրայելի բուժծառայությունը հայտնել է հրթիռակոծությունից հետո 35 տուժածի մասին։
Իրանի ԱԳ նախարար Աբբաս Արաղչին հայտարարել է, որ Իրանն Օմանի հետ խորհրդակցություններ է անցկացրել ԱՄՆ-ի հետ բանակցությունների նոր փուլի շուրջ, սակայն Իսրայելի հարվածներն ստիպել են դուրս գալ դիվանագիտության ուղուց:
Իրանը բալիստիկ հրթիռների կիրառմամբ հարվածներ էր հասցրել Իսրայելին՝ ի պատասխան Թել Ավիվի՝ ավելի քան 200 կործանիչի կիրառմամբ հունիսի 13-ի գիշերվա հարձակման, որի հետևանքով իրանցի բարձրաստիճան զինվորականներ են զոհվել: ՀՀ ԱԳՆ-ն դատապարտել էր Իսրայելի հարձակումն Իրանի վրա։
