Թեհրանը կարող է մեկ տարով դադարեցնել ուրանի հարստացումը, եթե Միացյալ Նահանգները համաձայնի ապաշրջափակել հանրապետության սառեցված ակտիվները և ճանաչի նրա խաղաղ նպատակներով հարստացման իրավունքը, հայտնել է ՏԱՍՍ-ը՝ հղում անելով Reuters գործակալությանը։
Գործակալության աղբյուրները հայտնել են, որ երկու կողմերը կարող են «քաղաքական համաձայնության» հասնել, եթե ԱՄՆ-ն ընդունի Իրանի պայմանները: Հարցը դեռևս չի քննարկվել ԱՄՆ բանակցային թիմի հետ: Նման համաձայնագրի պայմանների համաձայն՝ Իրանը մեկ տարով կդադարեցնի ուրանի հարստացումը: Բարձր հարստացված պաշարների մի մասը կուղարկվի այլ երկրներ կամ կվերածվի վառելիքի՝ խաղաղ նպատակներով:
Ըստ Reuters-ի՝ ԱՄՆ-ն բազմիցս հայտարարել է, որ Իրանի միջուկային ծրագրի վերաբերյալ նոր համաձայնագիրը պետք է ներառի հարստացման դադարեցում, որը, ենթադրաբար, կարող է օգտագործվել միջուկային զենք ստեղծելու համար: Իրանը բազմիցս հայտարարել է, որ չի մտադրվում նման զենք ստեղծել:
Իրանն ու ԱՄՆ-ն ապրիլի 12-ին, 19-ին, 26-ին և մայիսի 12-ին Օմանի միջնորդությամբ բանակցությունների չորս փուլ էին անցկացրել՝ իրանական միջուկային ծրագրի շուրջ համաձայնության հասնելու և Թեհրանի նկատմամբ պատժամիջոցները չեղարկելու նպատակով:
ԱՄՆ նախագահ Դոնալդ Թրամփը մայիսի 14-ին հայտարարել էր, որ Սպիտակ տան վարչակազմը պատրաստ է առավելագույն ճնշում գործադրել Իրանի վրա և զրկել նավթ արտահանելու հնարավորությունից, եթե երկու կողմերին չհաջողվի պայմանավորվածություն ձեռք բերել Թեհրանի միջուկային ծրագրի շուրջ: Մայիսի 18-ին Իրանի նախագահը հնարավոր է համարել միջուկային ծրագրի վերաբերյալ ԱՄՆ-ի հետ համաձայնության գալը՝ պայմանով, որ որ Վաշինգտոնը դադարեցնի Թեհրանին սպառնալ։
