2016 թվականին Փարիզում տեղի ունեցած զինված կողոպուտի մասնակիցները, որոնք ամերիկահայ դերասանուհի և գործարար Քիմ Քարդաշյանից գողացել էին թանկարժեք իրեր, դատապարտվել են մինչև ութ տարվա ազատազրկման, հայտնում է Le Figaro-ն։
Առավել խիստ դատավճիռ է կայացվել հանցախմբի պարագլուխ 69-ամյա Աոմար Աիտ Խեդաշի նկատմամբ՝ 8 տարվա ազատազրկում, որից 5-ը՝ պայմանական:
Նրա հանցակիցներն զգալիորեն ավելի քիչ ժամկետներ են ստացել և նույնպես ազատ են արձակվել կալանքից։ Նրանցից երկուսը, որոնք մեղադրվում էին աստղի համարում թանկարժեք իրերի մասին տեղեկություններ գողերին փոխանցելու մեջ, արդարացվել են:
Ընդհանուր առմամբ՝ մեղադրյալի աթոռին է հայտնվել 10 մարդ, որոնցից ամենատարեցը 71-ամյա Յունիս Աբասն է, ով տառապում է Պարկինսոնի հիվանդությամբ:
Խեդաշը, որը տառապում է շաքարային դիաբետով և գրեթե ամբողջությամբ կորցրել է խոսելու ունակությունն ու լսողությունը, գրավոր դիմել է Քարդաշյանին՝ ներողություն խնդրելով նրանից և հայտարարելով, որ խորապես զղջում է արածի համար: Չնայած այն հանգամանքին, որ դատարանի կողմից նշանակված պատիժը զգալիորեն պակաս խիստ էր, քան պնդում էր դատախազությունը (մինչև 10 տարվա ազատազրկում), դերասանուհու փաստաբանները հայտարարել են, որ նա բավարարված է դատավճռով: Դատական լսումների ժամանակ նա նաև խոսել է այն մասին, որ ներում է հանցախմբի պարագլուխին և ընդունում նրա ներողությունը:
2016 թվականի հոկտեմբերի 3-ին Քարդաշյանին զենքի սպառնալիքի տակ կապկպել էին Փարիզի շքեղ հյուրանոցի համարներից մեկում և գողացել շուրջ 10 միլիոն դոլար կանխիկ գումար ու զարդեր, այդ թվում՝ 4 մլն դոլար արժողությամբ նշանադրության ադամանդե մատանին, որը նվիրել էր այն ժամանակվա ամուսինը՝ Քանյե Ուեսթը:
Ֆրանսիական լրատվամիջոցները մեղադրյալներին անվանել էին «պապիկ կողոպտիչներ», քանի որ նրանցից ոմանք արդեն 70-ն անց են: Շատերն ունեն առողջական լուրջ խնդիրներ։
