ԱՄՆ նախագահ Դոնալդ Թրամփը հայտարարել է գործադիր հրամանագիր ստորագրելու մասին, որով մեկնարկում է պատմության մեջ առաջին կամավոր արտաքսման ծրագիրը։
Ըստ նախագահի՝ Միացյալ Նահանգներում անօրինական կերպով գտնվող օտարերկրացիները կենթարկվեն պատիժների, այդ թվում՝ հանկարծակի արտաքսման, եթե չօգտվեն ծրագրից։
Թրամփը մանրամասնել է, որ հակառակ դեպքում՝ ԱՄՆ-ն կորոշի, թե ինչպիսի տարբերակով անձը կարտաքսվի և որ երկիր։
«Ըստ այդմ՝ անօրինական կերպով ԱՄՆ-ում գտնվող բոլոր օտարերկրացիներին հորդորում եմ ամրագրել ձեր անվճար չվերթը հիմա»,- հայտարարել է Միացյալ Նահանգների ղեկավարը։
Հունվարին հրապարակված ԱՄՆ ներգաղթի և մաքսային ոստիկանության զեկույցի համաձայն՝ Հայաստանի շուրջ 2808 քաղաքացի կարտաքսվի ԱՄՆ-ից՝ երկրում ապօրինի ներգաղթյալների դեմ Թրամփի քաղաքականության շրջանակներում։ Ապրիլին The Wall Street Journal-ը գրել էր, որ ԱՄՆ-ն քննարկում է միգրանտներին Արևելյան Եվրոպայի երկրներ արտաքսելու հարցը։
