Ուկրաինայի նախագահ Վլադիմիր Զելենսկին արձագանքել է Հաղթանակի 80-ամյակի կապակցությամբ Ռուսաստանի նախագահ Վլադիմիր Պուտինի հայտարարած հրադադարի որոշմանը և փոխադարձ հրադադար հայտարարելու առաջարկին, գրում է RBC-ն։
«Անհապաղ, ամբողջական և անվերապահ հրադադար պետք է հայտարարել առնվազն 30 օրով, որպեսզի այն լինի երաշխավորված և հուսալի։ Սա այն է, ինչը կարող է հիմք տալ իրական դիվանագիտությանը»,- ասել է Զելենսկին։
Ուկրաինայի նախագահը «մանիպուլյացիայի փորձ» է անվանել ռուսական առաջարկը։ Նրա խոսքով՝ Կիևը դեռ մարտին էր համաձայնել հրադադարի մասին ամերիկյան առաջարկին։
Փետրվարի 12-ին ՌԴ և ԱՄՆ նախագահների հեռախոսազրույցից հետո մեկնարկել էր ռուս-ուկրաինական հակամարտության կարգավորման գործընթացը։
Ապրիլի 10-ին ՌԴ ԱԳՆ-ն հայտնել էր, որ Ռուսաստանը և ԱՄՆ-ն Ստամբուլում բանակցությունների ժամանակ համաձայնության են եկել մշակել «ճանապարհային քարտեզ»՝ ամերիկյան իշխանությունների կողմից բռնագրավված վեց ռուսական դիվանագիտական օբյեկտները վերադարձնելու համար։ Պետդեպարտամենտը հայտարարել էր, որ Ստամբուլի բանակցությունները «կառուցողական» էին։ Ապրիլի 26-ին ՌԴ նախագահի մամուլի խոսնակ Դմիտրի Պեսկովը հայտնել է Կուրսկի շրջանը Ուկրաինայի զինված ուժերից ազատագրելու գործողությունների ավարտի մասին։
Ապրիլի 28-ին Հաղթանակի 80-ամյակի կապակցությամբ ՌԴ նախագահը եռօրյա՝ մայիսի 8-11-ի կեսգիշեր, հրադադար հայտարարելու որոշում էր ընդունել։ Մոսկվան պնդել է, որ ուկրաինական կողմը պետք է հետևի այդ օրինակին։
