Ֆրանսիայի Նիցցա քաղաքում տեղի են ունեցել Օսմանյան կայսրությունում իրագործված Հայոց ցեղասպանության զոհերի հիշատակին նվիրված մի շարք միջոցառումներ։
Նիցցայի քաղաքապետարանի կազմակերպած միջոցառումներին ներկա էին քաղաքապետարանի ներկայացուցիչներ, ֆրանսիացի պատգամավորներ, հայ համայնքի անդամներ և տեղի բնակիչներ։
Քաղաքի տարբեր մասերում նաև այս հանցագործությունը դատապարտող երթեր են անցկացվել։ Հայկական սկաուտական կազմակերպության՝ ՀՄԸՄ-ի անդամները պարզել էին Հայաստանի և Ֆրանսիայի դրոշները։
Ֆրանսիայի նախագահ Էմանուել Մակրոնը հիշել էր Օսմանյան կայսրությունում իրականացված Հայոց ցեղասպանության զոհերին և կոչ արել պահպանել նրանց հիշատակը։ Ցեղասպանության զոհերի հիշատակին նվիրված միջոցառումներ են անցկացվել նաև Փարիզում։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 110-րդ տարելիցը։ Աշխարհասփյուռ հայությունը ոգեկոչման միջոցառումներով հիշում է 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 110 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Մարտին Հայաստանի վարչապետ Նիկոլ Փաշինյանը թուրքական լրատվամիջոցներին տված հարցազրույցում հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթություններից չէ։
Armenia Today-ի խմբագրակազմը հավաքել է Ցեղասպանության վերաբերյալ հիմնական ուսումնասիրություններ, ինչպես նաև արվեստի գործեր և դժոխքի տանջանքները վերապրած մարդկանց հիշողություններ։
