Մյանմայում տեղի ունեցած երկրաշարժի հետևանքով զոհվածների շրջանում ՀՀ քաղաքացիներ լինելու վերաբերյալ տվյալներ այս պահին չկան, Armenia Today-ին հայտնել է ՀՀ ԱԳՆ մամուլի խոսնակ Անի Բադալյանը։
ՀՀ ԱԳՆ-ն ցավակցություն է հայտնել տեղի ունեցած երկրաշարժի առթիվ։
«Ցնցված ենք՝ լսելով Մյանմայում, Թաիլանդում և հարևան երկրներում տեղի ունեցած սարսափելի երկրաշարժի մասին, որը շատ մարդկանց կյանք է խլել։ Մեր աղոթքները կմնան բոլոր տուժածների հետ՝ այս աղետի հետևանքներն արագորեն հաղթահարելու մաղթանքներով»,- ասվում է X-ում տարածված հաղորդագրության մեջ։
Մարտի 28-ին Մյանմայում 7,7 մագնիտուդով երկրաշարժ էր տեղի ունեցել: Ցնցումներն զգացվել էին նաև Բանգլադեշում, Հնդկաստանում, Թաիլանդում, Լաոսում և Չինաստանում: Մյանմայում երկրաշարժի հետևանքով զոհվել էր 13, վիրավորվել ավելի քան 200 մարդ։
