Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը կարող է դառնալ առաջին ֆուտբոլիստը, ով նվաճել է բոլոր երեք խոշոր եվրոպական գավաթները՝ Չեմպիոնների լիգան, Եվրոպայի լիգան և Կոնֆերենցիաների լիգան։ Այս մասին գրում է բրիտանական The Times թերթը՝ մարզիկի կարիերայի մասին «Անտեսվածից մինչև Միլանի «Ինտերի» հրաշք 36 տարեկանում» վերնագրով հոդվածում։
Հոդվածի հեղինակ, սպորտային թղթակից Ջեյմս Ղիրբրանտը նշել է, որ Մխիթարյանի համար «հորիզոնում պատմական նվաճում է նշմարվում», քանի որ դեռևս ոչ մի խաղացող չի հաղթել բոլոր երեք եվրոպական լիգաներում: Ըստ Ղիրբրանտի՝ Մխիթարյանն ունի իր կարիերայի ընթացքում փոխանցումների ճշգրտության ամենաբարձր ցուցանիշը և «Ինտերում» լավագույնն է գնդակը խլելու ու դաշտի վերջին հատվածն անցնելու վիճակագրությամբ: Հեղինակը Մխիթարյանին անվանել է անհավանական լրջության տեր մարդ մի աշխարհում, որտեղ տիրում է անլրջությունը։
«Մի մարդ, ում գրեթե վանական նվիրվածությունն իր գործին և իր երկիրը ներկայացնելու առաքելությանը հակասում էր կատակների, մելոդրամայի և անգլիական ֆուտբոլի անվերջ աղմուկի մթնոլորտին»,- ասվում է հոդվածում:
Ղիրբրանտը նշել է, որ 35 տարեկանից հետո ակումբային ֆուտբոլի ամենաբարձր մակարդակում մնալը հազվագյուտ և չափազանց դժվար ձեռքբերում է հայ ֆուտբոլիստի համար։ Չեմպիոնների լիգայում «Ֆեյենորդի» դեմ հաղթանակի ժամանակ նա հիանալի էր՝ շրջանցում էր իրենից 15 տարով փոքր խաղացողների՝ կատարելով 50-յարդանոց հաշվարկված փոխանցումներ, ինչպես նաև հաղթելով ավելի շատ մենամարտերում, քան որևէ մեկը, ասվում է հրապարակման մեջ:
Times-ի թղթակիցը հիշեցրել է Մխիթարյանի՝ «Մանչեսթեր Յունայթեդի» և «Արսենալի» կազմում գտնվելու մասին՝ անգլիական ֆուտբոլը նրա համար անվանելով «անիմաստ ոսկեզօծ վանդակ»։ Նա ընդգծել է, որ աշխարհի խոշորագույն լիգաներում փոքր երկրի ներկայացուցիչ լինելը ոչ միայն իր դրոշը հպարտորեն կրելու հնարավորություն է, այլ շատ ավելի բարդ և ակտիվ գործընթաց, որի ընթացքում Մխիթարյանը մշտապես բախվում էր իր ինքնության ընկալման հետ և պետք է որոշեր, թե որ ճակատամարտերի համար արժե պայքարել։ Ղիրբրանտը զարմանում էր, թե ինչու այս յուրահատուկ խաղացողը երբեք ամբողջությամբ չի բացվել և լիովին չի հասկացվել Անգլիայում:
Հեղինակն ընդգծել է, որ Մխիթարյանի հիմնական մոտիվացիան հայրն է՝ Համլետը, պրոֆեսիոնալ ֆուտբոլիստ, ով հանդես էր գալիս Խորհրդային Միության բարձրագույն խմբի «Արարատում» և Ֆրանսիայի «Լիգա 2»-ի Վալանսում։ Նա մահացել էր ուղեղի ուռուցքից 33 տարեկանում։
Ղիրբրանտը հիշեցրել է Մխիթարյանի խոսքերն այն մասին, որ իր ցանկությունն է «շարունակել այն ճանապարհը, որը հայրը չի հասցրել ավարտին հասցնել»։ Իր կարիերայի մայրամուտի այս տարիները, ըստ հեղինակի, այն մրցաշրջաններն են, որոնք Մխիթարյանի հայրը չի տեսել։
2022 թվականի մարտի 3-ին Մխիթարյանը հայտարարել էր Հայաստանի հավաքականում կարիերան ավարտելու մասին։ 2023 թվականի դեկտեմբերին նա պաշտպանել էր Արաս Օսբիլիսի թեկնածությունը Հայաստանի ֆուտբոլի ֆեդերացիայի ղեկավարի պաշտոնում՝ հակադրվելով ՀՖՖ ներկայիս նախագահ Արմեն Մելիքբեկյանին։ Փետրվարի 4-ին Մխիթարյանը հայտարարել էր, որ «կգա մի օր, երբ բոլորը կիմանան ճշմարտությունը» Հայաստանի ֆուտբոլի ֆեդերացիայի հետ իր հարաբերությունների և ազգային հավաքականից հեռանալու պատճառների մասին։
Հունվարին Մխիթարյանը ճանաչվել էր 2024 թվականին ՀՀ լավագույնս հանրահռչակած մարզիկ։
