ԱՄՆ պետքարտուղար Մարկո Ռուբիոն դատապարտել է արևմտյան Սիրիայում տեղի ունեցած սպանությունները և հայտարարել, որ Վաշինգտոնը աջակցում է երկրում կրոնական և էթնիկ փոքրամասնություններին։
«Միացյալ Նահանգները դատապարտում է արմատական իսլամիստ ահաբեկիչներին, այդ թվում՝ օտարերկրյա ջիհադիստներին, որոնք վերջին օրերին մարդկանց են սպանել Արևմտյան Սիրիայում։ ԱՄՆ-ն աջակցում է Սիրիայի կրոնական և էթնիկ փոքրամասնություններին, այդ թվում՝ քրիստոնյաներին, դրուզներին, ալավիներին և քրդական համայնքներին և ցավակցություն է հայտնում զոհերին և նրանց ընտանիքներին։ Սիրիայի ժամանակավոր իշխանությունները պետք է պատասխանատվության ենթարկեն սիրիական փոքրամասնությունների այս ջարդերի մեղավորներին»,- ասվում է նրա հայտարարության մեջ:
Մարտի 8-ին Ֆրանսիայի ԱԳՆ-ն խորը մտահոգություն է հայտնել սիրիական Տարտուս, Լաթաքիա և Հոմս նահանգներում տեղի ունեցած լուրջ բռնությունների կապակցությամբ և դատապարտել «վայրագությունները, որոնք ազդել են կրոնական քաղաքացիական անձանց և բանտարկյալների վրա»։
Փարիզը կոչ է արել Սիրիայի ժամանակավոր իշխանություններին ապահովել այդ հանցագործությունների անկախ հետաքննությունը և մեղավորներին դատապարտել: Արտաքին գործերի նախարարությունը նաև վերահաստատել է Փարիզի հավատարմությունը Սիրիայում «խաղաղ և ներառական քաղաքական անցմանը»՝ զերծ արտաքին միջամտությունից, որը «երաշխավորում է Սիրիայում էթնիկ և կրոնական բազմակարծության պահպանումը, որը երկրում մասնատումն ու բռնությունը կանխելու միակ միջոցն է»։
Միևնույն ժամանակ, Եվրամիությունը մարտի 8-ի հայտարարության մեջ դատապարտել է «վերջին հարձակումները, որոնք, իբր, իրականացվել են Ասադամետ տարրերի կողմից Սիրիայի ափամերձ շրջաններում ժամանակավոր կառավարական ուժերի դեմ, ինչպես նաև ցանկացած բռնություն խաղաղ բնակչության դեմ»: «Քաղաքացիական անձինք պետք է պաշտպանված լինեն բոլոր հանգամանքներում՝ հարգելով միջազգային մարդասիրական իրավունքը», – ասել է դաշինքի արտաքին քաղաքականության պատասխանատուն:
Իր հերթին, Թուրքիայի արտգործնախարար Հաքան Ֆիդանը սիրիական Լաթաքիայում տեղի ունեցող իրադարձություններն անվանել է սադրանքներ, որոնք ուղղված են խաթարելու սիրիական նոր իշխանությունների ջանքերը։
«Մենք տեսնում ենք սիրիական կառավարության ջանքերը խաթարելու փորձեր, այն քաղաքականությունը, որը նա վարում է առանց որևէ սադրանքի վերջին շաբաթներին։ Այստեղ շատ կարևոր է, որ Սիրիայի մեր բոլոր եղբայրները՝ լինեն ալավիներ, քրիստոնյաներ, թե դրուզներ, հեռու մնան այս սադրանքներից։ Որպես տարածաշրջանի երկրներ՝ մենք դեմ ենք ցանկացած ապակայունացնող գործողությունների»,- Ֆիդանի խոսքը մեջբերել է ՏԱՍՍ-ը։
Սիրիայում բախումների մասին հայտնի է դարձել մարտի 7-ին։ Մարտի 9-ի դրությամբ ավելի քան 1000 մարդ է զոհվել: Մարտի 8-ին հայտնի է դարձել Լաթաքիա մուտք գործելիս երկու հայերի սպանության մասին։ Ավելի ուշ հայ համայնքի ներկայացուցիչը Armenia Today-ին մանրամասներ է պատմել տարածաշրջանում տիրող իրավիճակի մասին։
