Սիրիայի արևմուտքում զոհերի թիվը գերազանցել է 1000-ը, հայտնել է AP-ն՝ հղում անելով Մարդու իրավունքների դիտորդական սիրիական կենտրոնին։
Զոհերի 745-ը խաղաղ բնակիչներ են, որոնք, հիմնականում սպանվել են մոտ տարածությունից կրակոցի հետևանքով։ Զոհվել են նաև կառավարական անվտանգության ուժերի 125 անդամ և 148 գրոհայիններ՝ կապված Սիրիայի նախկին նախագահ Բաշար ալ-Ասադի հետ:
Նշվում է, որ Լաթաքիա քաղաքի շրջակա տարածքներում անջատվել է էլեկտրականությունն ու ջուրը։ Կենտրոնի ղեկավար Ռամի Աբդուրահմանը ասել է, որ տեղի ունեցածը ամենախոշոր զանգվածային սպանություններից մեկն է ողջ սիրիական հակամարտության ընթացքում։ Նա պնդել է, որ մարտի 8-ի վաղ առավոտյան խաղաղ բնակիչների սպանությունները դադարեցվել են։
Գործակալության տվյալներով՝ վկայակոչելով ալավիական կրոնական փոքրամասնության ներկայացուցիչներով բնակեցված գյուղերի բնակիչներին, սուննի զինյալները փողոցներում կամ տների դարպասների մոտ գնդակահարել են ալավիներին՝ հիմնականում տղամարդկանց: Ալավիների բազմաթիվ տներ թալանվել են, ապա հրկիզվել:
Սիրիայի հյուսիս-արևմուտքում գտնվող Տարտուս նահանգի Բանիյաս քաղաքի բնակիչներն ասում են, որ սպանվածների մարմինները սփռված են փողոցներու, կամ տներում և տանիքներում, և ոչ ոք չի կարող դրանք վերցնել:
Սիրիայի պետական լրատվական գործակալությունը, վկայակոչելով պաշտպանության նախարարության անանուն պաշտոնյային, հաղորդել է, որ կառավարական զորքերը վերականգնել են վերահսկողությունը շրջանի մեծ մասի վրա:
Պաշտպանության նախարարության ներկայացուցիչը հավելել է, որ իշխանությունները փակել են ափամերձ շրջան տանող բոլոր ճանապարհները։
Լիբանանցի պատգամավոր Հայդար Նասերը հայտարարել է, որ մարդիկ փախչում են Սիրիայից՝ Լիբանանում անվտանգություն փնտրելու նպատակով, չնշելով, սակայան, գաղթականներ ստույգ թիվը։ Նասերն ասել է, որ Ասադի տապալումից հետո շատ ալավիներ հեռացվել են աշխատանքից, իսկ որոշ նախկին զինվորականներ, ովքեր սկզբում հաշտվել էին նոր կառավարության հետ, սպանվել են։
Բախումների սկսվելուց հետո հազարավոր ալավիներ ու քրիստոնյաներ լքել են իրենց տները, հայտնել է Reuters-ը՝ վկայակոչելով տեղի բնակիչներին։ Մի քանի հարյուր մարդ՝ հիմնականում կանայք, երեխաներ և ծերեր, ապաստան են գտել Լաթաքիայի Խմեյմիմ ռուսական ռազմաբազայում։ Սիրիայում բախումների մասին հայտնի է դարձել մարտի 7-ին։
Սիրիայում բախումների մասին հայտնի է դարձել մարտի 7-ին։ Մարտի 8-ին հայտնի է դարձել Լաթաքիա մուտք գործելիս երկու հայերի սպանության մասին։ Ավելի ուշ հայ համայնքի ներկայացուցիչը Armenia Today-ին մանրամասներ է պատմել տարածաշրջանում տիրող իրավիճակի մասին։
