Սպիտակ տանն Ուկրաինայի և ԱՄՆ-ի նախագահներ Վլադիմիր Զելենսկու և Դոնալդ Թրամփի վեճը ցույց տվեց, թե որքան դժվար կլինի Մոսկվայի և Կիևի միջև հակամարտության խաղաղ կարգավորման ճանապարհ գտնելը, РБК-ի փոխանցմամբ՝ հայտարարել է ՌԴ նախագահի մամուլի քարտուղար Դմիտրի Պեսկովը։
«Կիևի ռեժիմը և Զելենսկին խաղաղություն չեն ուզում, նրանք ցանկանում են, որ պատերազմը շարունակվի։ Այս իրավիճակում, իհարկե, Վաշինգտոնի ջանքերը և Մոսկվայի պատրաստակամությունը բավարար չեն»,- ասել է նա։
Պեսկովի խոսքով՝ Ռուսաստանը տեսնում է, թե ինչպես է «Արևմուտքը մասամբ կորցնում իր հավաքականությունը»։
«Կան երկրներ, որոնք ավելի շուտ պատերազմի կողմ են հանդիսանում, հայտարարում են պատերազմին աջակցելու և ռազմական գործողությունների շարունակությունն ապահովելու մասին։ Նրանք չեն ասում, որ պետք է արագ հասնել խաղաղության»,- հավելել է խոսնակը։
Խոսելով հակամարտության վերաբերյալ պետության ղեկավար Վլադիմիր Պուտինի արձագանքի մասին՝ Պեսկովը նշել է, որ «նախագահը, իհարկե, ծանոթ է տեղի ունեցածի էությանը» և դա հաշվի է առել։
«Նա գիտի բոլոր նրբությունները։ Բավականին աննախադեպ իրադարձություն. իհարկե, Զելենսկին շատ առումներով ցույց է տվել, հավանաբար, դիվանագիտական հմտությունների իսպառ բացակայություն»,- հավելել է Պեսկովը։
Ռուս-ուկրաինական կոնֆլիկտի կարգավորման գործընթացը մեկնարկել էր Պուտինի և Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Փետրվարի 18-ին ԶԼՄ-ները հայտնել էին, որ ԱՄՆ-ն ցանկանում է գրեթե լիակատար վերահսկողություն ունենալ ուկրաինական ռեսուրսների և դրանցից ստացված եկամուտների կեսի վրա։
Փետրվարի 28-ին Ուկրաինայի նախագահ Վլադիմիր Զելենսկին ժամանել էր Վաշինգտոն՝ հանքարդյունաբերության գործարք կնքելու համար։ Նրա հանդիպումը Թրամփի հետ սկսվել էր վիճաբանությամբ՝ հենց լրատվամիջոցների առջև, և գործարքը ձախողվել էր:
Կարդացեք նաև`
Ինչպե՞ս են վատթարացել ԱՄՆ-ի և Ուկրաինայի նախագահների հարաբերությունները:
