Եվրոպական պետությունների ղեկավարները վիճել են Փարիզում Ֆրանսիայի նախագահ Էմանուել Մակրոնի՝ Ուկրաինայի հարցով արտահերթ գագաթնաժողովի ժամանակ, հայտնել է Financial Times-ը:
«Հանդիպման ժամանակ եվրոպական երկրների առաջնորդների միջև կոնֆլիկտ է ծագել Ուկրաինա զորք ուղարկելու շուրջ քննարկման ժամանակ։ Հանդիպման նպատակը միասնական դիրքորոշման հասնելն էր Ռուսաստանի հետ ԱՄՆ նախագահ Դոնալդ Թրամփի խաղաղ բանակցություններին պատասխանելու հարցում»,- ասված է հրապարակման մեջ։
Փետրվարի 17-ին Փարիզում եվրոպական երկրների առաջնորդներն Ուկրաինայի հակամարտության հարցով արտակարգ գագաթնաժողով էին անցկացրել։ Բանակցություններին մասնակցել էին Ֆրանսիայի, Մեծ Բրիտանիայի, Գերմանիայի, Իտալիայի, Իսպանիայի, Դանիայի, Լեհաստանի, Նիդերլանդների առաջնորդները, ինչպես նաև ՆԱՏՕ-ի և Եվրամիության ղեկավարները:
Ֆրանսիայի նախագահ Էմանուել Մակրոնը խոստացել էր առաջիկա օրերին շարունակել Ուկրաինայի հարցով քննարկումը։
Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Թրամփն ու Պուտինը հեռախոսազրույց էին ունեցել նաև փետրվարի 12-ին։ Զրույցից հետո Թրամփը հայտնել էր, որ Պուտինի հետ պայմանավորվել է բանակցային գործընթաց սկսել Ուկրաինայում հակամարտությունը դադարեցնելու համար։
Փետրվարի 16-ին ԱՄՆ պատվիրակությունը մեկնել էր Սաուդյան Արաբիա՝ ՌԴ ներկայացուցիչների հետ բանակցությունների նպատակով։
Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել են Ուկրաինայի հարցով Ռուսաստանի և ԱՄՆ պատվիրակությունների բանակցությունները։
