Աթենքի հյուսիսային Օլիմպիական մարզադաշտում կայացած Metallica խմբի համերգի 80 000-անոց հանդիսատեսը մինի երկրաշարժ է առաջացրել, տեղեկանում ենք ekathimerini կայքից։
Ըստ հրապարակման՝ միջոցառումն այնքան բուռն է ընթացել, որ երկրաշարժերի մոնիթորինգի սարքավորումները գրանցել են ամբոխի շարժումներից առաջացած թույլ ցնցումներ։
Աթենքի գեոդինամիկական ինստիտուտը տվյալների ուղիղ հեռարձակմամբ ներկայացրել է, այսպես կոչված, «համերգային երկրաշարժերը», որոնք առաջացել են հազարավոր երկրպագուների համակարգված շարժումների հետևանքով, տեղեկացնում է կայքը։
Սեփական հիթերից բացի, Metallica-ն անակնկալ է մատուցել հույն հանդիսատեսին՝ կատարելով Միկիս Թեոդորակիսի հանրահայտ «Զորբա» ստեղծագործությունը և հունական Trypes ռոք խմբի «Դու ոչ մի տեղ չես տեղավորվում» երգը։
