ՀՅԴ Հայ դատի կենտրոնական խորհուրդը խոր մտահոգություն է հայտնում տարածաշրջանային էսկալացիայի պայմաններում Ադրբեջանի կողմից ՀՀ Սյունիքի մարզի նկատմամբ ահագնացող սպառնալիքների առնչությամբ, ասվում է Խորհրդի հայտարարության մեջ։
Նշվում է, որ իրանա-իսրայելական հակամարտության համատեքստում աշխարհաքաղաքական անկայունությունը խորացել է՝ ստեղծելով ադրբեջանական ագրեսիվ գործողությունների հավելյալ սպառնալիք, որոնք վտանգում են Հայաստանի ինքնիշխանությունը։
«Իսրայել-Իրան հակամարտության շարունակությունն ավելացնում է Հարավային Կովկասի անվտանգային բնապատկերի բարդությունը։ Ադրբեջանի ագրեսիվ դիրքորոշումը՝ արտերկրյա դաշնակիցների աջակցությամբ, մեծացնում է մտահոգությունը, որ Հայաստանը կարող է լինել թիրախ՝ տարածաշրջանային վերադասավորման անվան տակ»,- ասվում է հայտարարության մեջ։
ՀԴԿԽ-ն հիշեցրել է, որ Ադրբեջանի նախագահ Իլհամ Ալիևը բազմիցս հայտարարել է, որ «Զանգեզուրի միջանցքն» իրականացվելու է՝ «անկախ Հայաստանի կամքից»։
Հայ դատը միջազգային հանրությանը կոչ է արել անհապաղ միջոցներ ձեռնարկել, որպեսզի կանխվի Հայաստանի դեմ հերթական ագրեսիան։
«Դիվանագիտական ճնշումներ ու կոնկրետ գործողություններ պետք է ձեռնարկվեն՝ Հայաստանի տարածքային ամբողջականությունը պաշտպանելու նպատակով։ Նույնանման դիմումներով հանդես գալու և դիվանագիտական ու ռազմաքաղաքական զսպման մեխանիզմների ապահովման կոչ ենք անում նաև ՀՀ իշխանություններին»,- շեշտել են Հայ դատից։
Քաղաքագետ Հրանտ Միքայելյանն Armenia Today-ի «Խոսում ենք գլխավորի մասին» հաղորդման ընթացքում հայտարարել էր, որ Իսրայելի և Իրանի միջև լայնամասշտաբ ցամաքային պատերազմի դեպքում Ադրբեջանը կարող է օգտվել իրավիճակից և հարվածել Հայաստանին, առաջին հերթին՝ Սյունիքի մարզի ուղղությամբ:
Կարդացեք նաև՝
Փորձագետները գնահատել են Հայաստանի հնարավոր քայլերը` Իսրայելի կողմից Իրանի վրա հարձակման ֆոնին
