Հայաստանի ծանրամարտի պատանիների հավաքականի անդամ Գրիգոր Ղազարյանն Իսպանիայի մայրաքաղաք Մադրիդում ընթացող պատանիների Եվրոպայի առաջնության տղաների 84 կգ քաշային կարգում ոսկե մեդալ է նվաճել, հայտնել են Հայաստանի ծանրամարտի ֆեդերացիայից։
Ղազարյանը պոկում վարժությունում երեք հաջող մոտեցում է ունեցել` 140 կգ, 145 կգ, 148 կգ: Պոկում վարժության երրորդ մոտեցմամբ` 148 կգ, Ղազարյանը սահմանել է պատանիների Եվրոպայի նոր ռեկորդ:
Նշվում է, որ պոկում վարժությունում հայ ծանրորդը նվաճել է փոքր ոսկե մեդալ:
Հրում վարժության առաջին մոտեցմամբ Ղազարյանը բարձրացրել է 180 կգ` սահմանելով Եվրոպայի նոր ռեկորդ հրում վարժությունում ու երկամարտում: Ղազարյանը թարմացրել է սեփական ռեկորդը` հրում վարժությունում գլխավերևում պահելով 185 կգ ու 190 կգ: Այս ձևում ևս նա ոսկե մեդալակիր է:
Երկամարտի 338 կգ արդյունքով` Ղազարյանը 2025 թվականի պատանիների Եվրոպայի առաջնության չեմպիոն է հռչակվել:
Ավելի վաղ Լիմայում ընթացող ծանրամարտի պատանիների և երիտասարդների աշխարհի առաջնությունում Ղազարյանը երկամարտի 330 կգ արդյունքով աշխարհի չեմպիոն էր դարձել։
Մադրիդում ընթացող ծանրամարտի պատանիների Եվրոպայի առաջնությունում Հայաստանի հավաքականի ներկայացուցիչներ Ռաֆիկ Դարմոյանը և Նատալյա Սարգսյանը դարձել էին բրոնզե մեդալակիրներ։
