Իտալական «Էմպոլի» և «Բոլոնիա» ֆուտբոլային ակումբները հետաքրքրված են «Լոկոմոտիվի» և Հայաստանի հավաքականի պաշտպան Նաիր Թիկնիզյանով, գրում է Sport-express-ը։
Sport-express-ին հայտնի է դարձել, որ Նաիր Թիկնիզյանը երկու ակումբների հնարավոր տրանսֆերների ցանկում է:
Իտալական թիմերի սկաուտները հետևել են ֆուտբոլիստի խաղին՝ Եվրոպայի 2024թ. առաջնության որակավորման փուլում։ Խոսքը Հայաստան-Ուելս (4:2) և Հայաստան-Լատվիա (2:1) խաղերի մասին է։ Ուելսցիների հետ խաղում պաշտպանն արդյունավետ փոխանցում է կատարել, իսկ լատվիացիների հետ խաղում դարձել է գոլի հեղինակ:
Նախորդ մրցաշրջանում 24-ամյա հայ ֆուտբոլիստը «Լոկոմոտիվի» կազմում անցկացրել է 37 հանդիպում, դարձել 5 գոլի և 5 գոլային փոխանցման հեղինակ: Նրա պայմանագիրը «Լոկոմոտիվի» հետ ուժի մեջ է մինչև 2026 թվականի ամառ։
Հայաստանի հավաքականը հունիսի 16-ին «Քարդիֆ Սիթի» մարզադաշտում ՈւԵՖԱ-ի Եվրո-2024-ի ընտրական խաղում հաղթել է Ուելսին:
Հունիսի 19-ին Երևանում կայացավ ՈՒԵՖԱ Եվրոպայի 2024 թվականի առաջնության որակավորման խմբային փուլի Հայաստան-Լատվիա հանդիպումը: Մեր ընտրանին հաղթեց մրցակցին 2:1 հաշվով
