2025 թվականի հուլիսի 1-ից Հայաստանից Վրաստան և հակառակ ուղղությամբ ոչ կանոնավոր ուղևորափոխադրումները պետք է իրականացվեն հսկիչ փաստաթղթի (ուղևորների ցուցակի) առկայությամբ, հայտնել է ՀՀ տարածքային կառավարման և ենթակառուցվածքների նախարարությունը:
Նոր կարգավորումների համաձայն՝ այդ փաստաթղթի մեջ հարկավոր է լրացնել ուղևորների կոնտակտային տվյալներն ու նրանց քանակը։ Փոփոխությունները կվերաբերեն ավտոբուսներին և միկրոավտոբուսներին։ Ուղևորների ցուցակը կդառնա պարտադիր բոլոր Մ1 (մինիվեն), Մ2 և Մ3 (մինիվեններ, ավտոբուսներ և միկրոավտոբուսներ) դասի փոխադրամիջոցների համար:
Հսկիչ փաստաթուղթը պետք է լրացված լինի էլեկտրոնային եղանակով և դրա տպագրված թղթային օրինակը լինի տրանսպորտային միջոցի վարորդի մոտ։ Փաստաթղթի տարբերակը կարելի է ներբեռնել այստեղ:
Նախարարությունից նշել են, որ փաստաթղթին վերաբերող հարցերի դեպքում քաղաքացիները կարող են զանգահարել Ավտոմոբիլային տրանսպորտի քաղաքականության, լիցենզավորման և թույլտվությունների վարչություն՝ 010 511356 կամ 010 511343 հեռախոսահամաներով։
