Առողջապահության նախարարությունը մանրամասներ է հայտնել «Մուրացան» ԲԿ-ում 1,5 տարեկան երեխայի մահվան հանգամանքների մասին և դատապարտել բուժաշխատողի հանդեպ հարազատների կողմից բռնության կիրառումը։
«Արվել է հնարավորը երեխայի առողջական ծայրահեղ ծանր վիճակը կայունացնելու և կյանքը փրկելու համար։ Ցավոք, չի հաջողվել»,- ասվում է հաղորդագրության մեջ։
Shamshyan.com-ի տվյալներով՝ երեխայի տատիկի կողմից բռնության է ենթարկվել բժշկուհին, որին հարազատները մեղադրում են նրա մահվան մեջ:
«Դատաբժշկական նշանակված փորձաքննությունը և մեկնարկած իրավական գործընթացը կտան պատասխանները»,- հավելել են նախարարությունից:
Երևանի պետական բժշկական համալսարանի աշխատակազմի ղեկավար Շուշան Դանիելյանն այսօր ավելի վաղ Armenia Today-ին հայտնել էր, որ «Մուրացան» ԲԿ-ում 1,5 տարեկան երեխա է մահացել։ Երեխայի մահվան դեպքով քրեական գործ էր հարուցվել բուժաշխատողի մասնագիտական պարտականությունները չկատարելու հոդվածով։
