Պռոշյան և Քասախ համայնքների բնակիչները բողոքի ակցիա են իրականացրել տրանսպորտի 25 և 59 համարների գծերի կրճատման և նոր՝ ավելի թանկ երթուղու դեմ։ Ի նշան բողոքի ՝ նրանք ժամանակավորապես փակել են Երևան-Աշտարակ մայրուղու հատվածը:
Ըստ որոշման՝ նոր երթուղին Պռոշյան-Երևան ուղևորափոխադրումը (գյուղ Պռոշյանից մինչև ֆիզիկայի ինստիտուտը) կիրականացնի «Մուլտի Տրանսպորտ» ՍՊԸ-ին պատկանող թիվ 277 միկրոավտոբուսը: Ցուցարարների խոսքով՝ եթե Երևանում 30 կմ երթևեկության համար վճարում են 150 դրամ, ապա ինչո՞ւ պետք է իրենք 10 կմ-ի համար 250 դրամ վճարեն։ Բացի ֆինանսական կողմը, նրանք նշում են, որ երթուղին կպատճառի մի շարք անհարմարություններ։
«Տեղին և արդարացի ակցիա է։ Պռոշյանի բնակիչ եմ, այստեղ եմ ապրում ավելի քան 50 տարի։ Երբեք չենք կարողացել օգտվել որևէ քաղաքակիրթ տրանսպորտից՝ շուրջ 37 տարի։ Ես դասախոս եմ՝ Երևանի բուհում, տարիներ շարունակ չէի կարողանում ժամանակին հասնել համալսարան։ 37 տարի հետո հրաշք կատարվեց, տրանսպորտ կար, այնքան երջանիկ էինք։ Հիմա նորից ինչ-որ օլիգարխներ որոշել են բերել տրանսպորտ, որի երթուղին շատ կարճ է»,- նշել է ակցիայի մասնակից մի կին։
Բողոքի ակցիայի մասնակիցների խոսքով՝ նախարարության որոշմամբ «Երևան Տրանսպորտ» ՓԲԸ-ին պատկանող թիվ 25 երթուղիով (Պռոշյան-Ավան-Զեյթուն) ուղեգիծը կդադարի գործել:
Ցուցարարները համաձայնել են բացել մայրուղու մի հատվածն այն բանից հետո, երբ իրենց խոստացել են, որ մինչև խնդրի լուծումը կգործի թիվ 25 երթուղին, իսկ ապրիլի 7-ին՝ ժամը 17:30-ին, իրենց հետ կհանդիպի Տարածքային կառավարման և ենթակառուցվածքների փոխնախարար Արմեն Սիմոնյանը։
Նոր երթուղին ժամը 07:00-19:00-ն սպասարկելու է վեց միկրոավտոբուսով։ Ցուցարարներն ընդգծել են, որ եթե մինչև երկուշաբթի խնդիրը դրական լուծում չստանա, վրաններ կտեղադրեն վարչապետ Նիկոլ Փաշինյանի տան դիմաց և կմնան այնտեղ։
Այսօր ավելի վաղ Shamshyan.com-ը հայտնել էր, որ ակցիայի մասնակիցների հետ հանդիպել էին ՀՀ ներքին գործերի նախարարության ոստիկանության համայքային ոստիկանության գլխավոր վարչության պետ Գեորգ Ազիզյանը, ոստիկանության Նարիի բաժնի պետ Սուրիկ Ջանիկյանը և Պարեկային ծառայության Կոտայքի մարզի գումարտակի հրամանատար Լևոն Բադալյանը:
