Պետական եկամուտների կոմիտեն բացահայտել է ստվերային շրջանառության դեպք, ըստ որի՝ պետական բյուջե չի վճարվել շուրջ 8,2 միլիարդ դրամի հարկ, հայտնում է ՊԵԿ-ը։
Գերատեսչության տեղեկություններով՝ շինարարական նշանակության արտադրանքների արտադրությամբ և մանրամեծածախ առևտրով զբաղվող ՍՊ ընկերությունն իրեն պատկանող առևտրի սրահներում չի տրամադրել ՀԴՄ կտրոններ, դուրս չի գրել համապատասխան հաշվարկային փաստաթղթեր, ինչի արդյունքում թերհայտարարագրում է իրացման իրական շրջանառությունը, չի հաշվարկում և պետբյուջե չի վճարում հարկեր:
«Պարզվել է, որ տվյալ ընկերությունը 2014-2024 թվականների ընթացքում թաքցրել է շուրջ 27,5 մլրդ․ դրամի իրացման շրջանառություն: Արդյունքում՝ չեն հաշվարկվել և պետական բյուջե չեն վճարվել առանձնապես խոշոր չափերով՝ ընդհանուր շուրջ 8,2 մլրդ. դրամի հարկեր։ Քննչական կոմիտեում նախախաձեռնվել է քրեական վարույթ: Կատարվել են խուզարկություններ, առգրավվել են նախաքննությանը հետաքրքրող իրեր և փաստաթղթեր»,- հայտնում է ՊԵԿ-ը։
