Հերոս Խորեն Հաջաթյանի ընտանիքը տուն չունենալու պատճառով ևս ապրում է ՊՆ նախկին շենքում, որտեղ այսօր առավոտվանից լարված իրավիճակ է: Ոստիկանները դուրս են հանում բնակիչներին:
«Ծիծաղելի է, որ մոտ 100 ընտանիքի համար այսքան ոստիկան են լցրել այստեղ: Դե թող պատերազմի ժամանակ գնային սահման, որ իմ 18 տարեկան տղան հողի տակ չպառկեր»,- լրագրողների հետ զրույցում ասաց զոհված զինծառայող Խորեն Հաջաթյանի մայրը՝ Ասյա Սահակյանը:
«Երեխային դպրոց էի տարել: Եկա՝ մի ահավոր վիճակ տեսա: Ի՞նչ իրավունքով է ոստիկանը դուռը կոտրել: Ասում են՝ անօրինական ենք այստեղ բնակվում, շենքը պետական է: Այդ պատճառո՞վ են պետական դուռ կոտրում: Իմ ամուսինը շատ վատ վիճակում էր, իր համար քիչ առաջ շտապօգնություն կանչեցինք: Այդ վիճակում բերման են ենթարկել, նստեցրել մեքենայի մեջ է: Ասում եմ՝ թողեք դուրս գա մեքենայից, ասում են՝ դու քեզ կանացի պահի: Ասացի՝ ես այնքան կանացի եմ, որ հերոսի մայր եմ: Տղամարդկանց բերման են ենթարկել, որ ուժ չգործադրեն, կանանց հանել են դուրս: Հասկացանք, որ հրաման է տրված, իսկ մարդկային խիղճն ո՞ւր մնաց: 9 ամսական երեխային մայրիկի ձեռքից քաշում էին: Ներսում ահավոր վիճակ է, երեխաները գոռում են»,- ասաց նա:
Հիշեցնենք, որ այսօր առավոտյան ոստիկանները մտել են Աշտարակի խճուղու վրա գտնվող պաշտպանության նախարարության նախկին շենք, որտեղ բնակվում են ազատամարտիկների ընտանիքներ։ Բնակիչների խոսքով՝ ոստիկաններն իրենց ուժով հանել են շենքից՝ ասելով, որ շենքում անօրինական են բնակվում:
Մանրամասները՝ տեսանյութում:
