Հայաստան կատարած պաշտոնական այցի շրջանակում Հնդկաստանի զինված ուժերի պաշտպանության շտաբի պետ, գեներալ Անիլ Չաուհանին ընդունել է ՀՀ պաշտպանության նախարար Սուրեն Պապիկյանը, հայտնում է ՀՀ ՊՆ-ն։
Հանդիպմանը մասնակցել է նաև Հայաստանում Հնդկաստանի արտակարգ և լիազոր դեսպան Նիլակշի Սահա Սինհան։
Ըստ հաղորդագրության՝ Պապիկյանը բարձր է գնահատել պաշտպանության բնագավառում Հայաստան-Հնդկաստան համագործակցության ներկայիս մակարդակը՝ կարևորելով փոխգործակցության ծրագրերի կանոնավոր իրականացումը:
Գեներալ Չաուհանը, իր հերթին, հայտնել է Հնդկաստանի զինված ուժերի պատրաստակամությունը՝ շարունակելու համագործակցության զարգացումն առկա ուղղություններով և նախաձեռնելու փոխադարձ հետաքրքրություն ներկայացնող նոր ուղղություններ:
Նշվում է, որ հանդիպման ընթացքում քննարկվել են նաև տարածաշրջանային ու միջազգային անվտանգությանն առնչվող մի շարք հարցեր:
Ավելի ուշ ՊՆ վարչական համալիրում ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանն առանձնազրույց է ունեցել Չաուհանի հետ, որին հաջորդել է հանդիպում՝ պատվիրակությունների ընդլայնված կազմով:
Զրուցակիցները քննարկել են պաշտպանության ոլորտում Հայաստանի և Հնդկաստանի միջև համագործակցության ներկայիս ընթացքը, ամփոփել երկկողմ համագործակցության պլանի շրջանակում իրականացված միջոցառումների արդյունքները:
Կողմերն անդրադարձել են նաև 2026 թվականի համար պլանավորված միջոցառումների արդյունավետ իրականացմանը վերաբերող մի շարք հարցերի: Երկուստեք կարևորվել է կրթական, մասնագիտական վերապատրաստման, վարժանքների և զորավարժությունների, տարբեր բնագավառներում փորձի փոխանակման միջոցառումների անցկացումը Հայաստանում և Հնդկաստանում, նշել է ՊՆ-ն։
Ըստ հրապարակման՝ Ասրյանը ներկայացրել է ՀՀ զինված ուժերի կերպափոխման ուղղությունները՝ ընդգծելով պաշտպանության բնագավառում Հայաստան-Հնդկաստան համագործակցության կարևորությունն այս գործընթացում:
2022 թվականի սեպտեմբերին հաղորդվել էր, որ Հայաստանը Հնդկաստանի հետ 244 միլիոն դոլարի զենքի մատակարարման պայմանագիր է կնքել, այդ թվում՝ Pinaka բազմակի հրթիռային համակարգերի (MLRS): Հնդկական լրատվամիջոցների հաղորդմամբ՝ պայմանագիրը ներառում էր Pinaka չորս մարտկոցի մատակարարում, իսկ MLRS արձակիչների մատակարարումներն սկսվել էին 2023 թվականի հուլիսից և ավարտվել 2024 թվականի նոյեմբերին:
2024 թվականի հուլիսին հաղորդվել էր, որ Հայաստանը դարձել է Հնդկաստանից զենքի խոշորագույն ներմուծողը։ Հնդկաստանի ֆինանսների նախարարության տվյալներով՝ Հնդկաստանից Հայաստան զենքի ընդհանուր ներմուծումը 2024-2025 ֆինանսական տարվա սկզբին հասել էր 600 միլիոն դոլարի։
Հունվարին Հնդկաստանի կառավարության մամուլի և տեղեկատվության բյուրոն հայտնել էր, որ Հնդկաստանն սկսել է Pinaka կառավարվող հրթիռներ մատակարարել Հայաստանին։
