Ամերիկացի գործարար, SpaceX-ի և Tesla-ի գործադիր տնօրեն Իլոն Մասկը X-ի իր էջում հայտնել է, որ Հայաստանում հասանելի է Starlink գերարագ ինտերնետ ծառայությունը:
«Հայաստանը դարձել է աշխարհի 130-րդ երկիրը, տարածքը կամ շուկան, որտեղ հասանելի է Starlink գերարագ ինտերնետ ծառայությունը»,- գրել է Մասկը:
ՀՀ վարչապետ Նիկոլ Փաշինյանը գրել է, որ Starlink–ի բաժանորդները կարող են իրենց աշխատանքը կազմակերպել Հայաստանի Հանրապետության ողջ տարածքում, բնության գրկում, սարերում, դաշտերում, անտառներում՝ մնալով անմիջական կապի մեջ աշխարհի և բնության հետ։
Ավելի վաղ ԲՏԱ նախարարը հայտնել էր, որ Հայաստանում արդեն հասանելի են Starlink-ի արբանյակային ինտերնետ ծառայությունները:
Starlink-ը գլոբալ արբանյակային համակարգ է, որը տեղադրվել է SpaceX-ի կողմից՝ ապահովելու գերարագ լայնաշերտ արբանյակային ինտերնետ հասանելիություն այն վայրերում, որտեղ այն անհասանելի է։
2024 թվականի հոկտեմբերին ԲՏԱ նախարարությունից Armenia Today-ին հայտնել էին, որ նախարարությունը և Starlink ընկերությունը բանակցություններ են վարում Հայաստանի տարածքում ընկերության արբանյակային ցանցի գործարկման շուրջ։ Դեկտեմբերի 13-ին Starlink-ը Հայաստանում գործունեության թույլտվություն և լիցենզիա էր ստացել։
