ՌԴ ԱԳՆ խոսնակ Մարիա Զախարովան կտրուկ է պատասխանել հայ լրագրողի հարցին, թե ինչպե՞ս է Ռուսաստանը պատրաստվում արձագանքել ադրբեջանցիների կողմից Հայրենական Մեծ պատերազմի հերոսներին նվիրված հուշարձանների ոչնչացմանն Արցախում, մասնավորապես՝ Մարտակերտի շրջանի Վանք գյուղում։ Զախարովան մեղադրել է հայկական լրատվամիջոցներին՝ ասելով, որ նրանք անտեսում են նմանատիպ հուշարձանների «պղծման» դեպքերն այլ երկրներում, մասնավորապես՝ Եվրամիությունում։ Զախարովայի ճեպազրույցն ուղիղ միացմամբ հեռարձակվել է Armenia Today-ի YouTube-յան ալիքում:
«Ձեզանից երբեք չեմ տեսել աջակցություն այլ երկրներում հուշարձանների համաժողովրդական պաշտպանությանը։ Ինչո՞ւ դա Ձեզ չի դրդում նմանատիպ հարց տալ նաև այդ երկրներում։ Միգուցե արժե՞ նմանատիպ հարցեր ուղղել նաև Ձեր երկրում։ Բայց այդ թեման ինչ-ինչ պատճառներով դուրս է Ձեր տեղեկատվական տարածքից»,- նշել է Զախարովան։
Նա նաև հայտարարել է, որ լրագրողի տված հարցը «հայհոյանքի սահմանին» է։
Մայիսին ադրբեջանցիները ոչնչացրել էին Հայրենական Մեծ պատերազմի հերոսներին նվիրված հուշարձաններ օկուպացված Մարտունու շրջանի Եմիշջան գյուղում, ինչպես նաև Մարտակերտի շրջանի Վանք գյուղում։ Դրանք բացահայտած մոնիթորինգային կազմակերպությունը նշել էր, որ Բաքուն համակարգված կերպով իրականացնում է վանդալիզմի ակտեր՝ ուղղված Հայրենական պատերազմին նվիրված հուշարձանների դեմ, հատկապես՝ Հաղթանակի 80-ամյակից հետո։
