Արցախի պաշտպանության բանակի նախկին հրամանտար Լևոն Մնացականյանը Բաքվում կայացած «դատավարության» ժամանակ հերքել է «տուժողի» ցուցմունքները 2016 թվականի ապրիլյան պատերազմի դեպքերի վերաբերյալ:
Ինչպես հայտնում են տեղական լրատվամիջոցները, նիստի ժամանակ Էլմիր Աբասովը հայտարարել է, որ ինքն Ադրբեջանի ԶՈւ զինծառայող էր և վիրավորվել է 2016 թվականի ապրիլին: Նրա խոսքով՝ ռազմական գործողությունների ընթացքում հայկական կողմը «կիրառել է արգելված զինամթերք՝ թունավոր և հրկիզող արկեր»:
Մնացականյանն, ի պատասխան, հայտարարել է, որ առաջին անգամ է լսում այդ մասին։
«Ես մասնակցել եմ 2016 թվականին իրականացված գործողություններին, բանակի հրամանատարն էի։ Անկեղծ ասած՝ առաջին անգամ եմ լսում այստեղ ներկայացվածը»,- մեջբերում են նրա խոսքերը լրատվամիջոցները։
Ցուցմունքներ տվողներից մեկն էլ խոսել է 2020 թվականի հուլիսի 14-ի Տավուշի մարտական գործողությունների մասին։ Նա պատմել է հայկական կողմից իբր արձակված կրակի մասին, սակայն պարզ չէ, թե ինչ կապ ունեն այն ժամանակ տեղի ունեցած դեպքերն Արցախում ապօրինի ձերբակալված հայ գերիների հետ։
Հաջորդ «նիստը» տեղի կունենա մայիսի 30-ին։
Ադրբեջանում, պաշտոնական տվյալներով, 23 հայ գերի կա։ 2024-ի դեկտեմբերին Բաքուն դատարան է ուղարկել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին սկսվել են Արցախի առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, պետնախարար Ռուբեն Վարդանյանը, ԱԺ նախագահ Դավիթ Իշխանյանը, արտգործնախարար Դավիթ Բաբայանը, պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Ռուբեն Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
