ՀՀ իշխանություններն իրենց հակաարցախյան հռետորաբանությամբ որոշել են հող նախապատրաստել Երևանում Արցախի ներկայացուցչության փակման համար, հայտարարել է Ազգային ժողովի «Պատիվ ունեմ» խմբակցության քարտուղար Տիգրան Աբրահամյանը։
Ընդդիմադիր պատգամավորն իշխանություններին մեղադրել է այս կերպ Ադրբեջանին ևս մեկ «նվեր» մատուցելու մտադրության մեջ։ Նա հիշեցրել է, որ 2023 թվականի սեպտեմբերից ի վեր Արցախի ներկայացուցչությունը փակելու վերաբերյալ անընդհատ շանտաժ և սպառնալիքներ են հնչել։
«Այս պահին իշխանությունը որպես զիջում փորձում է Ադրբեջանին ծախել իր կոշտ դիրքորոշումն Արցախի ու արցախցիների ապագայի նկատմամբ` Ադրբեջանից ակնկալելով բարեհաճ վերաբերմունք»,- նշել է Աբրահամյանը։
Սակայն, ըստ ընդդիմադիր գործչի, ներկայացուցչության փակումը կունենա միայն խորհրդանշական իմաստ, քանի որ եթե նպատակն Արցախի պետական ինստիտուտների պահպանումն է, ապա դա կարող է կազմակերպվել այլ վայրերում։
2023 թվականի սեպտեմբերի 19-ին Ադրբեջանը հարձակվել էր Արցախի վրա։ Ռազմական գործողությունների ավարտից հետո Արցախի ողջ բնակչությունը բռնատեղահանվել էր։ Արցախից բռնի տեղահանված 100 632 քաղաքացի էր հասել ՀՀ։
Ադրբեջանի ռազմական ագրեսիայի հետևանքով, ՀՀ ՔԿ-ի վերջին տվյալներով, զոհվել էր ավելի քան 200, վիրավորվել՝ ավելի քան 300 մարդ, գերեվարվել՝ 16-ը, խոշտանգվել՝ 14-ը, անհետ կորել՝ 42-ը։ Սեպտեմբերի 25-ին Ստեփանակերտի մոտ գտնվող բենզինի պահեստի պայթյունի հետևանքով կա 218 զոհ, 21 անհետ կորած, 3 չնույնականացված դի և 120 վիրավոր։
