Ոլորտներից մեկը, որը «դիտարկում ենք, նավթի և նավթամթերքի արտահանումն է Ադրբեջանից Հայաստան», Դոհայում ընթացող միջազգային ֆորումի ժամանակ հայտնել է Ադրբեջանի նախագահի օգնական Հիքմեթ Հաջիևը:
Նրա խոսքով՝ այս հարցը քննարկվել է Հայաստանի փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի՝ նոյեմբերի 28-ին կայացած հանդիպմանն ադրբեջանական Գաբալա քաղաքում:
«Ոլորտներից մեկը, որը ներկայումս դիտարկում ենք, նավթի և նավթամթերքի արտահանումն է Ադրբեջանից Հայաստան։ Սա նաև աննախադեպ զարգացում է»,- շեշտել է Հաջիևը:
Ֆորումին մասնակցել է նաև ՀՀ անվտանգության խորհրդի քարտուղար Արմեն Գրիգորյանը: Նա, իր հերթին, հայտարարել է, որ հայ հասարակությունը պատրաստ է խաղաղության:
Հաջիևի կողմից TRIPP-ը («Միջազգային խաղաղության և բարգավաճման համար Թրամփի ուղի»-խմբ.) որպես «Զանգեզուրի միջանցք» տերմինաբանությամբ ներկայացնելուն ՀՀ ԱԽ քարտուղարը չի համաձայնել:
«Միջանցքի վերաբերյալ օգտագործվող տերմինն անընդունելի է մեզ համար, որովհետև Վաշինգտոնում կայացած գագաթնաժողովում Հայաստանի, Ադրբեջանի և Միացյալ Նահանգների ղեկավարներն ստորագրեցին փաստաթուղթ, որտեղ ճանապարհի ապաշրջափակումը կոչվում է «Թրիփ՝ Թրամփի ուղի դեպի միջազգային խաղաղություն և բարգավաճում»: Մենք հավատարիմ ենք այս տերմինին և վստահ ենք, որ սա շատ օգուտներ կբերի ոչ միայն տարածաշրջանին, այլև Ռուսաստանի սահմաններից դուրս գտնվող ձեռնարկություններին»,- ասել է նա:
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP («Միջազգային խաղաղության և բարգավաճման համար Թրամփի ուղի»-խմբ.) երթուղի:
ՀՀ փոխարտգործնախարարը նոյեմբերի վերջին հայտնել էր, որ TRIPP-ի շուրջ այս փուլում հայ-ամերիկյան համատեղ ընկերության ստեղծման վերաբերյալ քննարկում է ընթանում:
