«Զանգեզուրի միջանցքը» կարող է կարևոր դեր խաղալ Միջին միջանցքում, վերջին հինգ տարիների ընթացքում մենք առաջ ենք մղում այս օրակարգը, ադրբեջանական ԶԼՄ-ների փոխանցմամբ՝ Բաքվում ընթացող տնտեսական համաժողովի ընթացքում հայտարարել է Ադրբեջանի թվային զարգացման և տրանսպորտի նախարար Ռաշադ Նաբիևը։
Նրա խոսքով՝ վերջին տասնամյակներին աշխարհը հիմնականում կառավարվում էր մի քանի երկրների կողմից, սակայն աշխարհակարգը փոխվում է։ Այժմ տեսնում ենք գլոբալ փոփոխությունների միտումներ, որոնք ուղղված են Պարսից ծոցի, Հարավային Կովկասի, Կենտրոնական և Հարավարևելյան Ասիայի երկրներին։
Նաբիևն ընդգծել է, որ Միջին միջանցքը չի վերահսկվում միայն մեկ երկրի կողմից, և որ այն «բարիդրացիական հարաբերություններ ունեցող երկրների միություն է, որոնք կիսում են ընդհանուր նպատակներ և փոխադարձ շահ են բերում»։
«Այսօր ունենք փոխկախվածության փիլիսոփայություն։ Հասկանում ենք, որ յուրաքանչյուրիս հաջողությունը կախված է մյուսի հաջողությունից։ Հետևաբար, համակարգում ենք ոչ միայն ենթակառուցվածքային նախագծերը, այլև՝ ինչպես առավել արդյունավետ օգտագործել այդ ենթակառուցվածքները։ Քննարկվող թեմաներից մեկն այն էր, թե ինչպես կարելի է դիվերսիֆիկացնել Միջին միջանցքը։ Հետաքրքրություն առաջացավ, և առաջ քաշվեց այն գաղափարը, որ Զանգեզուրի միջանցքը կարող է կարևոր դեր խաղալ Միջին միջանցքում»,- նշել է նա։
Ադրբեջանցի նախարարը հավելել է, որ այս տարվա օգոստոսին այդ միջանցքը հաստատվել է միջազգային հարթակում, և որ ԱՄՆ նախագահ Դոնալդ Թրամփի և ՀՀ վարչապետ Նիկոլ Փաշինյանի միջև երկկողմ հանդիպման ժամանակ հնչել է այն տեսլականը, ըստ որի՝ «Զանգեզուրի միջանցքը» կդառնա Միջին միջանցքի կարևոր մաս։
«Մենք «Զանգեզուրի միջանցքը» չենք դիտարկում որպես գոյություն ունեցող ուղիների այլընտրանք։ Մենք վստահ ենք, որ այն կդառնա մի ուղղություն, որը կարևոր դեր կխաղա, օրինակ՝ այն ժամանակ, երբ եղանակային պայմանները կխանգարեն այլ ուղիներով բեռների փոխադրմանը։ Ընդհանուր առմամբ՝ ակնկալվում է, որ այդ միջանցքով հնարավոր կլինի լրացուցիչ տեղափոխել մինչև 15 միլիոն տոննա բեռ»,- եզրափակել է նա։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP (Trump Route for International Peace and Prosperity) տրանսպորտային երթուղին:
Սեպտեմբերի 9-ին Ադրբեջանը պատրաստակամություն էր հայտնել 2026-ին ավարտել «Զանգեզուրի միջանցքի» իր հատվածի աշխատանքները։ Ադրբեջանի նախագահ Իլհամ Ալիևն ընդգծել էր «Զանգեզուրի միջանցքի» կարևորությունը՝ նշելով, որ այն մոտ ապագայում կդառնա Միջին միջանցքի նշանակալի երթուղի։
