Ադրբեջանում ՄԱԿ-ի Մանկական հիմնադրամի (ՅՈՒՆԻՍԵՖ) գրասենյակը 2025 թվականի սեպտեմբերի 3-ին կդադարեցնի գործունեությունը, հայտնում են ադրբեջանական լրատվամիջոցները՝ հղում անելով ՅՈՒՆԻՍԵՖ-ի Եվրոպայի և Կենտրոնական Ասիայի հաղորդակցության տարածաշրջանային ղեկավար Իրինա Մազուրին։
«ՅՈՒՆԻՍԵՖ-ի գործունեությունն Ադրբեջանում կդադարեցվի։ Կազմակերպությունը կշարունակի համագործակցել Ադրբեջանում գտնվող գործընկերների հետ իր տարածաշրջանային գրասենյակի և գլխավոր գրասենյակի միջոցով»,- նշել է նա։
ՅՈՒՆԻՍԵՖ-ն Ադրբեջանում գործել է 1993 թվականից՝ նպաստելով երեխաների և դեռահասների համար պայմանների բարելավմանը։ Մազուրին մայիսին հայտնել էր Բաքվում ներկայացուցչության փակվելու մասին։
Վերջին ամիսներին մի շարք միջազգային կազմակերպություններ, այդ թվում՝ ՄԱԿ-ի Զարգացման ծրագիրը, Կարմիր խաչի միջազգային կազմակերպությունը, ՄԱԿ-ի փախստականների հարցերով գերագույն հանձնակատարի գրասենյակը, Transparency International-ը և այլն, ավարտել էին իրենց գործունեությունն Ադրբեջանում։ Տեղական իշխանությունները սա բացատրում են «հումանիտար կարիքների կրճատմամբ և ավելի մեծ ինքնուրույնության ձգտմամբ»՝ պնդելով, որ այդ կազմակերպությունների ռեսուրսները կարող են օգտագործվել ավելի կարիքավոր տարածաշրջաններում։
