ԱՄՆ նախագահ Դոնալդ Թրամփը հայտարարել է Հայաստանի և Ադրբեջանի միջև հակամարտության կարգավորման «հաջող ավարտի» հնարավորության մասին:
ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ թվարկելով հակամարտությունները, որոնց կարգավորմամբ զբաղվում է նրա վարչակազմը, Թրամփը հայտարարել է, որ ԱՄՆ-ն «լուծել է ևս մեկ հակամարտություն»:
«Հայաստան և Ադրբեջան. Թվում է, թե այն ավարտին կհասնի, հաջող ավարտին»,- ասել է ԱՄՆ նախագահը։
Հունիսի 30-ին «Քարնեգի» հիմնադրամի վերլուծաբան Օլեսյա Վարդանյանը նշել էր, որ ԱՄՆ նախագահ Դոնալդ Թրամփի վարչակազմը Երևանին ու Բաքվին առաջարկ է ներկայացրել Ադրբեջանը Հայաստանի տարածքով Նախիջևանի հետ կապող ճանապարհի մասին։ Հոդվածում ասվում էր, որ գործընթացն առաջ մղելու համար ԱՄՆ-ն հնարավոր է՝ փորձի համոզել Ադրբեջանին հրաժարվել Հայաստանի Սահմանադրության առնչվող իր պահանջներից։
ԱՄՆ պետքարտուղար Մարկո Ռուբիոն հուլիսի 8-ին հույս էր հայտնել, որ հարավկովկասյան երկու երկրների միջև շուտով խաղաղության համաձայնագիր կկնքվի։ Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը հուլիսի 10-ին բանակցություններ էին վարել Աբու Դաբիում:
Հանդիպումից հետո ՀՀ արտաքին գործերի նախարարությունը հայտնել էր, որ կողմերը համաձայնել են շարունակել երկկողմ բանակցությունները և վստահության ամրապնդման միջոցառումները երկու երկրների միջև: Ադրբեջանական լրատվամիջոցները հաղորդել էին, որ հանդիպմանը քննարկվել է նաև, այսպես կոչված, «Զանգեզուրի միջանցքի» բացման հարցը:
ՀՀ ԱԳ փոխնախարար Մնացական Սաֆարյանը հայտարարել էր, որ Հայաստանի ինքնիշխանության, իրավազորության, տարածքային ամբողջականության մասին սկզբունքների պահպանման դեպքում Հայաստանը դեմ չէ Սյունիքի ճանապարհի արտապատվիրակմանը որևէ երրորդ ընկերության։
Հուլիսի 14-ին Թուրքիայում ԱՄՆ դեսպան Թոմ Բարաքը հայտարարել էր, որ ամերիկյան մասնավոր ընկերությունը կարող է ստանձնել «Զանգեզուրի միջանցքի» կառավարումը, որպեսզի մեռյալ կետից շարժի Բաքվի և Երևանի միջև խաղաղ բանակցությունները:
