Թուրքիայում քրդամետ «Ժողովուրդների հավասարություն և ժողովրդավարություն» կուսակցության (DEM) կետրոնական վարչությունն ապրիլի 24-ի կապակցությամբ կոչ է արել ներողություն խնդրել հայերից, քանի որ վերականգնողական արդարադատությունը կենսական նշանակություն ունի հանրային համերաշխության կառուցման հարցում։
«110 տարի է անցել 1915 թվականի ապրիլի 24-ին սկսված էթնիկական ինքնության, հավատքի և մշակույթի ցեղասպանությունից, երբ 200 հայեր տեղահանվեցին իրենց տներից և կոտորվեցին։ Այս ընթացքում հարյուր հազարավոր հայեր կոտորվեցին։ Այս քաղաքականության և գործելակերպի արդյունքում այս հողերում այլ քրիստոնյա ժողովուրդներ նույնպես կոտորվեցին և սպանվեցին»,- ասված է հայտարարության մեջ:
Ըստ հայտարարության՝ քաղաքական և հասարակական մակարդակով պետք է ընդունվի, որ Թուրքիայի տարածքում ապրող որևէ էթնիկ ինքնություն, լեզու, մշակույթ կամ հավատք առավել չէ մյուսներից, այլ բոլորը հավասար են։
«Տարբերությունները ջնջելով միատարր հասարակություն ստեղծելու մոտեցումը/ընկալումը մոլորություն է եղել»,- շեշտել են կուսակցությունից։
Հայտարարության մեջ անդրադարձ է եղել նաև պաշտոնական Երևանի հետ հարաբերությունների կարգավորմանը։
«Չափազանց կարևոր է, որ խաղաղության և հավասար պայմանների մեջ ապրենք մեր տարածաշրջանի հնագույն ժողովուրդներից մեկի՝ հայ ժողովրդի և մեր հայ քաղաքացիների հետ։ Միևնույն ժամանակ մեր տարածաշրջանի մի մասը կազմող ՀՀ հետ դիվանագիտական, առևտրային, տնտեսական և մշակութային հարաբերությունների զարգացումը և՛ ժողովուրդների համար անհրաժեշտություն է ու նրանց շահն է, և՛ Կովկասում խաղաղություն կառուցելու ուղին է»,- ընդգծել է կուսակցությունը։
Թուրքիայի նախագահ Ռեջեփ Թայիփ Էրդողանը Մեծ Եղեռնի 110-րդ տարելիցի կապակցությամբ ուղերձ է հղել Թուրքիայի հայ համայնքին: Սակայն նա կրկին խուսափել է «Ցեղասպանություն» եզրույթը հիշատակել և հրաժարվել է զանգվածային սպանությունների պատասխանատվությունը դնել Օսմանյան կայսրության իշխանությունների վրա, ինչպես և ամեն տարի:
Ապրիլի 24-ին նշվում է Օսմանյան կայսրությունում տեղի ունեցած Հայոց ցեղասպանության 110-րդ տարելիցը, որը 20-րդ դարի առաջին ցեղասպանությունն է։ Այս օրը հայերը և ամբողջ քաղաքակիրթ աշխարհը հարգանքի տուրք են մատուցում մարդկության դեմ կատարված հրեշավոր հանցագործության զոհերի հիշատակին, որը խլել է մեկուկես միլիոնից ավելի հայերի կյանք։
Armenia Today-ի խմբագրակազմը հավաքել է Ցեղասպանության վերաբերյալ հիմնական ուսումնասիրություններ, ինչպես նաև արվեստի գործեր և դժոխքի տանջանքները վերապրած մարդկանց հիշողություններ։
