ՀՀ վարչապետ Նիկոլ Փաշինյանն Ադրբեջանի իշխանություններին կոչ է արել հրաժարվել բեմականացված գործողություններից և էսկալացիաների բեմականացման քաղաքականությունից, հաստատել ինստիտուցիոնալ խաղաղություն:
«Հայաստանը ոչ միայն պատրաստ է, այլև չի հրաժարվելու այս ճանապարհից»,- ասված է վարչապետի՝ «Արմենպրես»-ում հրապարակված հոդվածում։
Ըստ Փաշինյանի՝ Բաքվի հակահայկական հռետորաբանության մասին են վկայում տարածքային պահանջները՝ այսպես կոչված «Արևմտյան Ադրբեջանի» հայեցակարգի, Ադրբեջանի 3,9 միլիարդ դոլարի ռազմական ծախսերը, ինչպես նաև Բաքվում հայ ռազմագերիների թատերականացված դատավարությունները։
Վարչապետը նշել է, որ հայկական բանակի բարեփոխումն ուղղված է բացառապես երկրի միջազգայնորեն ճանաչված սահմանների պաշտպանությանը, այլ ոչ թե հարձակման նախապատրաստելուն։ Նա հերքել է այն պնդումները, թե Հայաստանն ակտիվորեն զինվում է, սակայն հայկական բանակի բարեփոխումները կապել է Ադրբեջանում առաջացած սպառնալիքների հետ:
«Այս սպառնալիքները գալիս են Ադրբեջանի իշխանության ամենաբարձր օղակներից, որտեղ Հայաստանի տարածքի մոտ 60%-ն անվանում են այժմ Հայաստանի վերահսկողության տակ գտնվող տարածքներ»,- նշել է նա:
Փաշինյանը նաև գրել է, որ Հայաստանի կողմից հնարավոր ագրեսիայի մասին Ադրբեջանի պնդումներն անհիմն են։ Հայաստանը ճանաչում է Ադրբեջանի տարածքային ամբողջականությունը նախկին Ադրբեջանական ԽՍՀ-ի սահմաններում և հավատարիմ է մնում Պրահայում 2022 թվականին ձեռք բերված պայմանավորվածություններին, հիշեցրել է Փաշինյանը։
Վարչապետը հիշեցրել է Հայաստանի պատրաստակամությունը՝ ստորագրելու տարածքային պահանջները բացառող խաղաղության պայմանագիր և սպառազինությունների փոխադարձ վերահսկողության մեխանիզմներ ստեղծելու առաջարկը։
Փաշինյանը հունվարի 31-ին «Արևմտյան Ադրբեջան» խոսույթը ոտնձգություն էր անվանել Հայաստանի տարածքային ամբողջականության նկատմամբ։ 2024 թվականի դեկտեմբերի 19-ին նա «կառուցողական» էր անվանել Հայաստանի դիրքորոշումը ԵԱՀԿ Մինսկի խումբը լուծարելու Բաքվի պահանջի վերաբերյալ։
Հունվարի 7-ին Ադրբեջանի նախագահ Իլհամ Ալիևը Հայաստանը «տարածաշրջանի համար սպառնալիքի աղբյուր» և «ֆաշիստական պետություն» էր անվանել։ Նա հայտարարել էր նաև, որ Հայաստանի սպառազինումը «միայն նոր լարվածության կհանգեցնի»։ Հունվարի 8-ին Փաշինյանը, արձագանքելով Ալիևին, նշել էր, որ Բաքուն փորձում է տարածաշրջանում էսկալացիայի «լեգիտիմություն» ձևավորել։ Հունվարի 9-ին Փաշինյանն Ադրբեջանին ուղղված 12 առաջարկ էր հրապարակել, որոնց թվում էին ԵԱՀԿ Մինսկի խումբը լուծարելը, փոխադարձաբար էսկալացնող խոսույթներից և պահանջներից հրաժարվելը։
