Եվրահանձնաժողովը մտադիր է ուսումնասիրել Հայաստանի օրենսդրական նախաձեռնությունը՝ հանրապետության Եվրամիությանն անդամակցության գործընթացն սկսելու վերաբերյալ, հայտնում է «ՌԻԱ Նովոստի»-ն՝ հղում անելով Եվրոպական արտաքին գործերի ծառայության պաշտոնական ներկայացուցիչ Անիտա Հիպերին։ Եվրահանձնաժողովը նախատեսում է նաև հարցը քննարկել Երևանի հետ։
«Մենք կվերլուծենք (օրինագիծը – խմբ.) և կքննարկենք այն Հայաստանի իշխանությունների հետ»,- Հիպերի խոսքերն է մեջբերում գործակալությունը։
Կառավարությունը հունվարի 9-ի նիստում հավանություն էր տվել ԵՄ-ին Հայաստանի անդամակցության մեկնարկի մասին օրինագծին։ Օրինագիծը պաշտոնականացնում է Հայաստանի մտադրությունը՝ շարժվել դեպի եվրաինտեգրում, ինչպես նաև նախատեսվում է ստեղծել «ավելի աշխատանքային մթնոլորտ» ԵՄ ներկայացուցիչների հետ այս օրակարգի հետագա քննարկման համար։ Միաժամանակ, Հայաստանի վարչապետ Նիկոլ Փաշինյանն ընդգծել է, որ ԵՄ-ին երկրի անդամակցության վերջնական որոշումը կարող է կայացվել միայն համապետական հանրաքվեի միջոցով։
Հունվարի 9-ին Կրեմլը մեկնաբանել էր կառավարության այս նույն որոշումը։ ՌԴ նախագահի մամուլի քարտուղար Դմիտրի Պեսկովը նշել էր, որ Հայաստանը չի կարողանա միաժամանակ լինել ԵՄ և Եվրասիական միության անդամ։ Նույն օրը ՌԴ փոխվարչապետ Ալեքսեյ Օվերչուկը հայտարարել էր, որ ԵՄ-ին Հայաստանի անդամակցության մասին օրինագիծը երկիրը կանգնեցնում է ընտրության առջև։ Նա նաև նշել էր, որ Մոսկվան ԵՄ-ին անդամակցելու նախագծի քննարկումը դիտարկում է որպես ԵԱՏՄ-ից Հայաստանի դուրս գալու սկիզբ։
ՌԴ Պետդումայի պատգամավոր, ԱՊՀ հարցերով հանձնաժողովի փոխնախագահ Կոնստանտին Զատուլինը «դավաճանություն» էր անվանել Հայաստանի կառավարության որոշումը՝ աջակցելու ԵՄ-ին անդամակցության սկզբի մասին օրինագծին։
