Հայաստանը Հավաքական անվտանգության պայմանագրի կազմակերպությունից (ՀԱՊԿ) դուրս գալու համար փաստաթղթեր չի ներկայացրել, ասել է ՌԴ ԱԳ նախարար Սերգեյ Լավրովը և նշել, որ անվտանգային հարցերում Մոսկվան «ոչ մեկին ոչինչ չի պարտադրում»։ Նա այսպես է մեկնաբանել ՀՀ վարչապետ Նիկոլ Փաշինյանի խոսքերը, թե «Հայաստանն իրեն համարում է ՀԱՊԿ-ից դուրս»։
«Նման փաստաթուղթ չի ստացվել։ Մենք լսում ենք այս խոսակցությունները, Հայաստանի վարչապետը շատ է խոսել և քննարկել այս թեման խորհրդարանում։ Մենք ոչ մեկին ոչինչ չենք պարտադրում։ Համոզված ենք՝ Հայաստանի անվտանգության շահերից է բխում առավելագույնս օգտագործել անդամակցությունը ՀԱՊԿ-ին»,- ՏԱՍՍ-ին ասել է Լավրովը։
Ռուս նախարարի խոսքով՝ ՀԱՊԿ-ից դուրս գալու որոշումը լինելու է Հայաստանի իշխանությունների ինքնիշխան իրավունքը։ Միևնույն ժամանակ, Մոսկվան և կազմակերպության մյուս անդամները չեն ձեռնարկի որևէ գործողություն, որը կընկալվի «որպես Երևանի դեմ դռների փակում», նշել է նա։
Մարտի 25-ին Փաշինյանը հայտարարել էր, որ Հայաստանը սառեցրել է իր մասնակցությունը ՀԱՊԿ-ին, սակայն չի արգելափակում նրա որոշումները։ Հունիսի 13-ին Փաշինյանը խորհրդարանում 2023թ․ բյուջեի կատարման քննարկմանը հայտարարել էր, որ Երևանի հաջորդ «տրամաբանական քայլը» կլինի ՀԱՊԿ-ից դուրս գալը։ Փաշինյանը վերաբերմունքը փոխելու պայման էր համարել Բելառուսի դուրս գալը կազմակերպությունից, ինչպես նաև Բելառուսի նախագահ Ալեքսանդր Լուկաշենկոյի ներողությունը հայ ժողովրդից՝ 2020 թվականի պատերազմի ժամանակ Բաքվին աջակցելու խոսքերի համար։
