Մեքսիկայի մայրաքաղաքում հազարավոր մարդիկ բողոքի ակցիաների են դուրս եկել բռնի հանցագործությունների, կոռուպցիայի և նախագահ Կլաուդիա Շեյնբաումի քաղաքականության դեմ կարգախոսներով, հայտնում է Reuters-ը:
Ոստիկանության հետ բախումների հետևանքով տուժել է առնվազն 120 մարդ, որոնցից 100-ը հենց ոստիկանության աշխատակիցներ են: Երթեր են անցկացվել նաև երկրի այլ քաղաքներում։ Ցույցերի առիթ է դարձել նաև Ուրուապանի քաղաքապետ Կառլոս Մանսոյի վերջերս կատարված սպանությունը, որը կոչ էր անում կոշտ միջոցներ ձեռնարկել թմրակարտելների դեմ:
Ցուցարարների խմբերից մեկը սոցիալական ցանցերում մանիֆեստ է տարածել, որում ասվում է, որ երիտասարդները հոգնել են բռնությունից, կոռուպցիայից և իշխանության չարաշահումից: Նշվում է, որ ակցիայի մասնակիցների մեծ մասը երիտասարդներ են, հիմնականում «սերունդ Զ»-ի ներկայացուցիչներ: Ցույցերի ընթացքում ցուցարարներին հաջողվել է ապամոնտաժել ազգային պալատը պաշտպանող պատնեշի մի մասը, որտեղ բնակվում է Շեյնբաումը:
Ի պատասխան՝ համալիրը հսկող ոստիկանությունն ամբոխի դեմ արցունքաբեր գազ է կիրառել։ Բողոքի ցույցերի արդյունքում իշխանությունները ձերբակալել են 20 մարդու։ Նրանց տարբեր մեղադրանքներ են առաջադրվել, այդ թվում՝ կողոպուտի և հարձակման համար։
Ընտրվելուց ի վեր Մեքսիկայի նախագահը կարողացել է որոշակի հաջողությունների հասնել ֆենտանիլի առևտրի դեմ պայքարում: Այնուամենայնիվ, նախագահին քննադատում են բռնությունները դադարեցնելու անկարողության համար, և նա բախվում է հարևան երկրների աճող թշնամանքի հետ: Շեյնբաումի կառավարությունը կասկածի տակ է դրել ցուցարարների դրդապատճառները՝ ասելով, որ երթերը կազմակերպվել են հիմնականում աջակողմյան քաղաքական հակառակորդների կողմից և խթանվել են սոցիալական ցանցերում բոտերով:
