ՀԷՑ-ի գործադիր տնօրենի տեղակալ, իրացման բաժնի տնօրեն Դավիթ Ղազինյանն աշխատանքից ազատվել է, Armenia Today-ին հայտնել է ընկերության մամուլի խոսնակ Նատալյա Սարջանյանը։
Ավելի վաղ Civic.am-ը գրել էր, որ ՀԷՑ-ում պետության կողմից նշանակված ժամանակավոր կառավարիչ Ռոմանոս Պետրոսյանի հրամանով Ղազինյանն աշխատանքից ազատվել է։ Պետրոսյանը չէր բացառել, որ աշխատանքից կարող են ազատվել ՀԷՑ-ի թոփ-մենեջմենթի ներկայացուցիչները։ Նա հայտարարել էր, որ «Ղազինյանը ձև չունի» մնալու իր պաշտոնին, քանի որ մեկն է նրանցից, ով ընկերությունն «այս վիճակին է հասցրել»։ Նա Ղազինյանին դիմում գրելու և հեռանալու կոչ էր արել, նշելով՝ այլապես իր առաջին հրամանը լինելու է Ղազինյանին ազատելը՝ «վստահության կորստի հիմքով»։ Ղազինյանը լրագրողներին ասել էր, որ չի պատրաստվում հրաժարականի դիմում գրել։
Վերջին մեկ ամսվա ընթացքում վարչապետ Նիկոլ Փաշինյանը երկու անգամ սպառնացել է ազատել ՀԷՑ-ի աշխատակիցներին «Տաշիր» ընկերությունների խմբի նախագահ, ընկերության սեփականատեր Սամվել Կարապետյանին աջակցելու, ինչպես նաև «քաղաքական ինտրիգների մասնակցելու» համար։
Այնուամենայնիվ, ընկերության աշխատակազմը հայտարարել էր Սամվել Կարապետյանին լիարժեք աջակցման մասին։
Կարդացեք նաև՝
Սակագնի հետ կապված խնդիրներ, մեծ տույժեր․ Նարեկ Կարապետյանը՝ ՀԷՑ-ի պետականացման ռիսկերի մասին
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
Աուդիտ և հնարավոր ազատումներ՝ թոփ-մենեջմենթում. ի՞նչ է կատարվում ՀԷՑ-ում ժամանակավոր կառավարչի նշանակումից հետո
