Հուլիսի 10-ին Աբու Դաբիում նախատեսված է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը հայ-ադրբեջանական խաղաղության գործընթացի շրջանակում, հայտնել է վարչապետի խոսնակ Նազելի Բաղդասարյանը:
Վարչապետն այսօր՝ հուլիսի 9-ին, աշխատանքային այցով կմեկնի Արաբական Միացյալ Էմիրություններ, կհանդիպի ԱՄԷ նախագահ Շեյխ Մուհամմադ բին Զայեդ Ալ Նահյանի հետ։
ԱՄՆ պետքարտուղար Մարկո Ռուբիոն հուլիսի 8-ին հույս էր հայտնել, որ շուտով Հայաստանի և Ադրբեջանի միջև խաղաղության համաձայնագիր կկնքվի։
«Սրբազան պայքար» շարժման առաջնորդ Բագրատ արքեպիսկոպոս Գալստանյանը կալանավայրից հղած նամակում պնդել էր, որ Ստամբուլում Փաշինյանի և Թուրքիայի նախագահ Ռեջեփ Էրդողանի հանդիպմանը համաձայնեցվել էր Փաշինյան-Ալիև հանդիպումը՝ խաղաղության պայմանագիր ստորագրելու նպատակով:
ՀՀ վարչապետի և Ադրբեջանի նախագահի նախորդ հանդիպումը տեղի էր ունեցել մայիսին՝ Ալբանիայի մայրաքաղաք Տիրանայում Եվրոպական քաղաքական համայնքի գագաթնաժողովի շրջանակում։
