Ռուսաստանը չի ցանկանում միջամտել Հայաստանի ներքին գործերին, հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով Հայաստանում տեղի ունեցած վերջին իրադարձությունները:
«Առաջին հրթին՝ դա Հայաստանի ներքին գործն է։ Մենք ոչ մի կերպ չենք ցանկանում միջամտել այդ ներքին գործերին»,- Պեսկովի խոսքը մեջբերում է ՏԱՍՍ-ը։
Նրա խոսքով՝ Հայաստանն, անշուշտ, Ռուսաստանին շատ մոտ երկիր է։
«Եկեք չմոռանանք, որ մենք ունենք մի քանի միլիոն հայ։ Նրանք Ռուսաստանի Դաշնության քաղաքացիներ են, ովքեր, իհարկե, ցավով են նայում այդ իրադարձություններին: Մենք պետք է հասկանանք, թե ինչ է տեղի ունենում։ Շատերն, իհարկե, չեն ընդունում, թե ինչպես է դա տեղի ունենում»,- ասել Է Պեսկովը։
Հունիսի 27-ին ԱԱԾ աշխատակիցները քննչական գործողություններ էին իրականացրել Շիրակի թեմի առաջնորդարանում և Ամենայն Հայոց Կաթողիկոս Գարեգին Բ-ի նստավայրում։
Ուժայինները երկու ժամ ժամանակ էին տվել Աջապահյանին, որպեսզի ինքնակամ ներկայանա իրենց մոտ, հակառակ դեպքում՝ նրանք սպառնացել էին վերադառնալ և ուժային գրոհ սկսել Վեհարանի վրա։ Աջապահյանը համաձայնել էր ներկայանալ իրավապահ մարմիններ և ապացուցել իր նկատմամբ հարուցված գործի անօրինականությունը։
ՔԿ-ում քննչական գործողություններ իրականացնելու ընթացքում Աջապահյանի փաստաբան Արա Զոհրաբյանն արքեպիսկոպոսի գրավոր հայտարարությունն էր հրապարակել, որով խնդրել էր իրեն վարչապետի թեկնածու չդիտարկել։ Զոհրաբյանը նաև հայտնել էր, որ արքեպիսկոպոսը բերման է ենթարկվել իշխանության զավթման գործով։
Հունիսի 25-ին իշխանության զավթման փորձի շուրջ քրեական գործի շրջանակում 2 ամսով կալանավորել էր մեկ տասնյակից ավելի մարդ, այդ թվում՝ «Սրբազան շարժման» առաջնորդ Բագրատ Գալստանյանը։
