Անկարայում հանդիպել են Հայաստանի և Թուրքիայի ԱԳ փոխնախարարներ Վահան Կոստանյանը և Բերրիս Էքինջին, X-ում հայտնել է ՀՀ ԱԳՆ-ն:
Հանդիպման ընթացքում նրանք կարծիքներ են փոխանակել երկկողմ և տարածաշրջանային հարցերի շուրջ։
Փակ սահմաններով երկու հարևան երկրներն արդեն մի քանի տարի սկսել են հարաբերությունների կարգավորման փուլը:
ՀՀ վարչապետ Նիկոլ Փաշինյանը 2023 թվականին աշխատանքային այցով ժամանել էր Թուրքիա՝ մասնակցելու Թուրքիայի նախագահ Ռեջեփ Թահիփ Էրդողանի երդմնակալության արարողությանը, որտեղ նրան դիմավորել էր հայ-թուրքական հարաբերությունների կարգավորման հարցով հատուկ ներկայացուցիչ Սերդար Քըլըչը։
Վերջին անգամ Հայաստանի ԱԳ նախարարի գլխավորած պատվիրակությունը Թուրքիա էր մեկնել Անթալիայի տնտեսական ֆորումին։
«Հրապարակ» օրաթերթը հունիսի 14-ին հայտնել էր, որ Փաշինյանը հունիսի 20-ին մեկնելու է Անկարա՝ հանդիպելու Թուրքիայի նախագահի հետ:
